李龍基哽咽心痛未婚妻：羅湖監獄有好多蚊 否認合謀作故仔拒向被騙藝人致歉 丨獨家
發佈時間：07:00 2024-07-12
上月19日，李龍基的36歲未婚妻王青霞（Chris）因虛假文書等五項罪名被判入獄25個月。將於本月21日舉行《真情流淚基不可失》個唱的基哥，收拾心情接受《頭條日報》訪問，提到「羅湖監獄有好多蚊」突然哽咽，更為Chris大話冚大話解畫，「可能佢想我威啲，作為李龍基身邊女人要提高返啲，咁先MATCH到。」對被質疑想乾手淨腳撇甩王青霞而策劃「入獄事件」，基哥力斥造謠者，「𠵱家香港人變得好負面，睇人仆街最開心！」採訪：方騫平 攝影：羅安強 場地：hotel icon天外天
73歲的基哥為王青霞案件孭咗大筆律師費，坦言有錢搵，唔再介意演唱會用咩名義出發：「我明白嘅，主辦單位借呢排新聞招徠，最重要吸引到觀眾入場，原來啲人唔知我會唱歌，𠵱家反而多咗新Fans，包括懲敎署職員，所以世事冇絕對，唔好睇得咁負面，呢段時間經歷咗咁多事，我同『老婆』真係睇開咗好多。」近數月，基哥和何伯成為「花生友至愛」，基哥表示：「我唔想因為咁(王青霞事件)令自己咁紅，咁紅冇意思，只想用歌感動人。」基哥唔介意俾何伯搶風頭，更感同身受：「人與人之間感情冇得解釋，兩個人嘅事外間唔會知。」結過兩次婚，交過多個女友的基哥向在獄中的Chris許下愛的承諾：「就算仲有誘惑，但心底盡量做到保證，呢個係我最後嘅女人。」
覺得Chris會做返好人
經此一役，基哥坦認Chris有向他道歉唔夠坦白，他有信心Chris會懂得反省，做返個好人，「以前佢後生諗唔通鑽牛角尖，可能佢想我威啲，作為李龍基身邊女人要提高返啲，咁先可以MATCH得到，而我真係好愛呢個女人，被愛情蒙蔽會絕對信佢，亦都寵壞咗佢，我心態係『唔影響咁大，冇傷害到別人就由佢，提升自己冇嘢喎』，不過，若然我再清醒啲，唔會有呢啲嘢發生，甄妮評論我『扮豬食老虎』，我承認我真係豬，係LuLu。」基哥曾公開講過坐過Chris揸嘅飛機，又讚過對方畫功有藝術天份及出身富貴！基哥唔認合謀「講故事」：「我絕對冇講大話，2018年喺美國時，我坐住佢揸嘅組裝直升機，喺佢公司上空好短途咁飛咗一圈，當時唔知佢冇牌㗎，其實揸直升機好簡單，以前學過都有概念，尤其美國好兒嬉；至於畫畫，佢第一幅畫畀我嘅畫，我覺得佢係有天份，打後嘅臨摹淘寶畫作，我唔理佢啦。」問到被揭發偷圖又如何？基哥即無言以對：「𠵱家我知道咗，若然係真就過份咗，但案件塵埃落定，不再深究。」
甄妮狠批基哥。甄妮不留餘地斥基哥扮豬食老虎。
問到會否向所有被騙藝人致歉？基哥包容說：「無需要，佢做過啲乜大家已經好清楚，已受到應有懲罰，乜都還晒，無需要受2次傷害。以一個嬌生慣養嘅女仔嚟講，政府罰得佢好重，而且每個人都有過去。」基哥忍唔住哽咽：「每次諗起佢喺入面好心痛，羅湖監獄有好多蚊，佢要坐到明年7月7日…」追問點解決呢年性需要？基哥哎呀一聲說：「冇所謂啦又唔係20幾歲咁渴求，我最大興趣係玩模型飛機，玩飛機一樣得。」
慨歎香港人變得好負面
另外，基哥最不忿被指係「幕後黑手」，舉報Chris：「唔明佢哋點解會咁諗，我為咗呢個女人淨身出戶，將8層樓連2個車位(最新)畀晒前妻(第2任妻子)，我對錢好冷漠，作『故事』嘅人可以做編劇…」他又慨歎香港人變得好負面：「睇人仆街最開心，呢個氛圍最唔好！𠵱家網上媒體為刷流量鍾意講乜就講乜嚟傷害人；傳統媒體都應該要隱惡揚善，社會才美好。」基哥以1967年木屋屋頂俾超強颱風温黛吹走，由父輩朋友籌錢重建作例子。「人與人之間要互相幫助，𠵱家啲人只會剝花生挖人陰暗面，話我日頭見Chris入獄就喊苦喊忽，夜晚笑晒口去葉子楣生日會，其實係朋友狂打3次電話叫我去解悶。」他形容心臟已變得強大，所謂「一犬吠影百犬吠聲」，唔使理會，他堅稱唔會改變做嘢態度：「如果因為Chris影響到對我嘅睇法，係你眼光唔好。」
