森美分享簡單秘訣：唔好令小朋友驚讀書 育成IB榜眼女兒 醫科兒子 丨獨家
發佈時間：07:00 2024-07-24
森美孻女梁曦童今年IB考獲44分，成為IB榜眼；大仔梁曦樂年前亦喺英國嘅A-Level課程取得4科A*，以高材生姿態返港入讀港大「神科」醫學系。能夠培育一對子女成為學霸，森美分享獨門育兒細節，他堅持唔使PUSH，首要對小朋友有正面回饋，就算唔合格都要讚，以退為進畀到佢哋信心：「細路讀書好重要，唔好令佢哋驚讀書！」採訪：方騫平 攝影：朱偉彥 場地：Oyster Station
患有過度活躍症嘅森美，當年會考以1A5B，共25分考上中大新聞和傳理系，加埋名校出身嘅靚老婆Veronica被讚一屋叻人，森美卻唔敢誇讚仔女好叻：「只係小朋友肯讀書，作為父母會有個安心，但唔會冇擔心，呢幾日為咗討論選科及未來路向，媽咪緊張咁問多兩句，個女都會唔開心，兩母女有吵架㗎，我就糾正個女『就算成績好，都唔可以對父母態度唔好。』其實每個家庭唔會所有嘢都好，正如自己以前都好任性，覺得讀大學唔係一切，唔肯着大學袍同父母影畢業相，𠵱家長大咗會有啲後悔。」
有快樂就搵到錢
目前森美放手畀囡囡決定去英國劍橋大學讀心理學還是留港讀醫：「媽咪梗係想佢留低，可以見佢多啲，我反而建議佢選修音樂，佢由細到大都鍾意音樂，牧童笛及長笛考上演奏級；敲擊樂就讀到8級，有啲嘢唔係用錢去衡量，搵到自己鍾意嘅嘢最重要，擁有快樂人生自然會搵到錢，咁樣就係最幸福。」森美突然又有感而發，指喺學術上經已無能為力教導子女：「兒子成日會更正我講嘅嘢，𠵱家只能教到佢哋做人，因為佢哋嘅缺點來自我身上，唔想佢哋都行冤枉路。」
唔合格都要鼓勵
談到獨門育兒法，他認為小朋友首要條件唔好驚咗讀書，並以女兒為例，她由細到大會自動自覺勤力讀書，除咗用唔同顏色筆將筆記寫到好靚，仲會沖杯茶擺好張枱，要有個好嘅學習環境，將讀書變成一種生活享受，唔會考試前才臨急抱佛腳：「我唔會Push仔女死讀書，只會以退為進話『唔使攞滿分，咁高分唔會知道自己錯啲乜，有80分經已拍爛手掌』；囝囝試過中文科得50分，我就讚佢『合格都ok呀，咁想唔想再高啲分？想嘅話仲爭咗啲乜呀？』即使唔合格，我都會鼓勵佢『差1分合格都唔錯呀！想唔想攞埋嗰1分？咁還欠啲乜？』就算只得20分，也說『都有分呀...』用呢個方向教導會較好，企喺佢哋立場提出問題，感覺係錫佢哋，唔係吩咐佢哋做啲乜，佢哋既聽得入耳，又唔會破壞父子關係。」
「O嘴」小學生似他
他又建議家長們因應小朋友特點來學習，唔好介意古怪行為：「我專注力失調會行來行去讀書，越嘈嘅地方，比如喺酒樓，就越集中到精神讀到書，好記得喺廁所讀書曾俾阿媽鬧。」森美尤其提醒家長切忌打鬧問子女「做晒啲功課未？」：「咁樣佢哋每次做功課都唔快樂，只會越做越求其，我經常講笑話『唔好急最緊要快』，心情急求其做，同用心快做好唔同，心急做係唔會享受到做功課嘅快樂。我中一去咗聖士提反書院寄宿，因為冇嘢做，成日坐喺書枱度畫功課，點知越畫越高分，越覺得做功課好開心，從中吸取到知識，第一年考全級15名，才察覺自己原來識讀書，自然對自己有要求，會畀心機去讀，所以要對小朋友有正面回饋，對佢有信心大於分數高低，要教佢哋做人，要對自己有要求，就算讀唔到書都要盡過力。」另外，對於爆紅嘅油天小學生「O嘴」片，森美形容小朋友好可愛：「𠵱家做小學生唔容易，片中表示『讀書係我本份』嘅陳同學打官腔都幾叻，將來係公關人才，會有領導才能，至於後面『O嘴』同學仔係我細個嘅翻版。」
