Anson Lo對戀愛「Open」：有拖拍就拍！ 邁向30 望照顧全家無憂慮 丨名人雜誌
發佈時間：15:15 2024-07-28
盧瀚霆（Anson Lo）明年將步入30，其目標是承擔全家人的生活，令教父、教母、教姐和小狗Amber無憂無慮地過每一天，教主更大方談戀愛路：我open㗎！有拖拍都會拍！
撰文：陳凱詩 攝影：林賓尼
髮型：Denny Ku @Chic private I salon
化妝：Mayling Suen @Annie G. Chan Makeup Centre
服裝：Lane Crawford
造型：PIPA Creative
場地：No. 5 Studio HK
Lo為暑假推出新歌《Hey Hey OK!》，一如既往rap詞部分由他親自操刀填寫：「呢一首係好summer vibe跳唱歌，希望大家聽完之後有放暑假、開心party，無憂無慮嘅感覺。」與對上一首情歌《深閨》形成強烈對比，一冷一熱Lo認同兩首歌是完全100%相反，希望自己每一首歌都有不同風格；而《Hey Hey OK!》帶出的訊息是希望大家活在當下，遇到困難時用正面的態度去看事情，這樣每一件事都懷着輕鬆心情去渡過。」
Lo除了在網上向神徒（粉絲暱稱）發起《Hey Hey OK!》招牌舞步challenge，圈中朋友都有份，先後在社交網分享與馮允謙、梁嘉茵（Serrini）、謝安琪女兒Kakaball（張靖）、lollytalk等跳舞影片，Lo表示：「大概邀請了10位嘉賓，多謝每一位接受邀請，大部分都係前輩級別，所以搵佢哋嘅時候都好緊張。」
沖繩拍MV晒健康活力
問到Lo自己最OK及最不OK的甚麼事？他直言：「最OK嘅係返到屋企可以即刻沖涼，因為返到屋企如果冇得沖涼，就會覺得好污糟，覺得整污糟屋企；最唔OK嘅事就係朝早要食早餐，因為我自己唔係好鍾意做嘢之前，食一餐好豐富嘅嘢，感覺個人好唔ready工作，如果我空肚做一樣嘢，感覺個人會sharp醒啲。」
新歌MV專程飛到沖繩拍攝，中學時期是校內泳隊的Lo到底有冇落水，他笑說：「我係有落水游咗幾下，其實本身想拍少少游水shot，不過，因為拍攝嗰度比較淺水，啲水只到我膝頭哥，如我游水嘅話，啲石係會喺我個肚度刮住我咁游，所以最後就唔成事。」今次MV只露出強勁的臂彎，未有神徒們期待的性感泳照，Lo笑指新歌以夏日健康為主，不想以騷肌性感成賣點，但為了這個MV，向來瘦底的他就由去年底已開始操練身體。
改善Work-Life Balance
講起身體問題，Lo的健康就疑似響起警號，不但聲帶水腫並且暈厥情況嚴重，為此做了幾個身體檢查，但一直未有透露報告結果，令神徒們非常擔心，在生日會上Lo透露與家人提起身體狀況時，「教姐」更擔心到喊咗成晚，不過當問到身體報告時，Lo就三緘其口：「唔太方便透露，因為透露完之後大家會更加擔心！（生活上會否有改變或影響？）個報告係唔關生活習慣事，醫生都話我依家生活習慣上，冇乜壞習慣一定要戒，所以正常生活就OK，唔關作息飲水事。」
目前work-life balance，比半年前改善了，Lo坦言：「我將工作速度減慢咗好多，雖然醫生話唔關事，我自己都飲多咗水，食少咗甜嘢，嘗試早瞓，呢啲係會幫到手，overall健康都會好啲。（做運動有冇幫助？）做運動普遍個人都會健康啲，但都唔關個報告事，大家唔使擔心，依家都好function到。（跳舞有冇影響？）係冇影響嘅。」
只望家人活得無憂慮
7月7號剛踏入29歲生日，神徒們炮製了連串驚喜，包括耗資7位數字的無人機匯演、教主碼頭、免費摩天輪等等。明年即將邁向30歲，三十而立的他被問到有甚麼目標？非常愛疼家人的Lo Lo說：「希望30歲時可以無憂無慮咁去照顧到全家人，因為爹哋媽咪已經退咗休，跟住家姐我又想照顧埋，又要養我隻狗Amber，所以個支出都大，希望30歲可以做到無憂無慮。（其實依家都做到？）唔係，未去到無憂無慮，想照顧到屋企人，佢哋想做咩都得，想去旅行就去旅行，想食咩就食咩，想佢哋嘅生活水平再好啲。」Lo短期內能達成的目標，就是今年全家人一齊去旅行。
至於自己的感情生活，Lo大方回應：「我open㗎！如果有得拍拖我都會拍，正常人嚟嘅，我諗正常人都有友情、愛情、工作，每一方面都重要，所以有嘅話就會拍。」
接拍了杜琪峰的新戲是Lo在2024年的重點工作之一，之前杜Sir透露會停拍一段時間，Lo指電影計劃是on and off咁拍，不是一次過拍晒。而繼巴黎及沖繩後，Lo希望下一次MV能夠到英國拍快歌。
