冼靖峰驚訝同方皓玟食餐飯就傳緋聞 變咗LOONG 9代言人慘被迫回應丨獨家
發佈時間:07:00 2024-08-06
![冼靖峰驚訝同方皓玟食餐飯就傳緋聞 變咗LOONG 9代言人慘被迫回應丨獨家](https://image.hkhl.hk/f/1024p0/0x0/100/none/980f841cb9388fc77423d88f5e432de6/2024-08/Ent__.png)
冼靖峰(Archie)相隔1年半推出新歌《無意冒犯》,以18歲苦追鄰校女生1年作主題,最終追女失敗但因刻骨銘心,希望透過歌曲作紀念。講到跟方皓玟鬧緋聞,他再澄清非單獨約會,只因合作而多了接觸,抱歉影響到前輩,而單身的他為事業搏殺完全唔諗拍拖。採訪:杜杜 攝影:林賓尼 髮型:Hugo Poon@PRIVATE i salon 化妝:King Yip@KingsMakeUp 場地:The AIR (The ONE)
拍過幾次拖的Archie,最深刻反而是18歲曾經「做兵」,「每日搭嗰班港鐵都見到個女仔,佢眼大大長頭髮好有氣質,我為見佢試過早到都等埋坐佢嗰班車。」後來兩人在聯校活動認識,他為追上品學兼優的「女神」出盡法寶,「佢鍾意動漫我專登去睇,又搵私人教練學打羽毛球,好勤力讀書,雖然我哋晚晚傳訊息,但我始終唔敢開口表白,怕好似首歌咁,會冒犯咗佢,連朋友都冇得做。」上到大學兩人成為校友,他有坦白跟女方重提此事,「佢竟然話當時等緊我同佢講,可能冇開始到,我又真係好鍾意佢,所以特別深刻。」
事業搏殺期唔諗拍拖
談到跟方皓玟一齊食飯而傳緋聞,Archie再重申兩人關係,「我都好驚訝!大家只係食餐飯啫,仲有其他工作人員喺度,有咩新聞衝住我嚟都OK,最唔好意思打搞到前輩。」他解釋主持音樂節目《J Music》認識對方,還因傾緊合作多聯絡,「未知用咩形式呈現畀大家睇。」26歲的他完全唔心急拍拖,「𠵱家係事業搏殺期,我都算幾黐身嘅男友,冇時間不如唔好開始,可能能力大啲,管理到自己時間先諗!」
![Archie跟方皓玟因合作《J Music》而認識。 Archie跟方皓玟因合作《J Music》而認識。](https://image.hkhl.hk/f/1024p0/0x0/lr/sthl/a90c13171042f12ee528b220f355fc05/2024-08/IMG_2678.jpg)
![Archie慶幸跟方皓玟的緋聞,未有影響兩人合作計劃。 Archie慶幸跟方皓玟的緋聞,未有影響兩人合作計劃。](https://image.hkhl.hk/f/1024p0/0x0/lr/sthl/70fdda17217a2b13bdfd0e70b7814994/2024-08/0F0A6745.jpg)
講到所屬男團LOONG 9終能順利在港舉行活動,Archie直言不用再做「代言人」鬆一口氣,「嗰時大家都迫我回應,但其實有啲嘢我唔方便講,等公司講會好啲,但我變咗發言人咁,不過大家咁關心我哋都值得開心。」他又透露LOONG 9將有新搞作,「會再有合體嘅工作,可能要有啲訓練,大家應該會睇得開心,詳情等公司正式公布。」
![專心為事業努力的Archie,暫時未有打算拍拖。 專心為事業努力的Archie,暫時未有打算拍拖。](https://image.hkhl.hk/f/1024p0/0x0/lr/sthl/633915f78c3e74039ffaac628b286201/2024-08/BUN_8039.jpg)
![專心為事業努力的Archie,暫時未有打算拍拖。 專心為事業努力的Archie,暫時未有打算拍拖。](https://image.hkhl.hk/f/1024p0/0x0/lr/sthl/eed6dffb4c1d75fbf41ed0a1c081ed2a/2024-08/BUN_8053.jpg)