陳凱詠手震狂喊死撐話冇事嚇親朋友 做獨立歌手攞苦嚟辛致抑鬱丨獨家
發佈時間：07:00 2024-08-07
30歲的陳凱詠(Jace)曾被環球唱片力捧，本來上位在望，可惜因理念唔同跟公司各行各路。被冰封一年重新出發的Jace承認情緒曾經不隱，持續幾個月手震、口震、係咁喊，甚至透唔到氣，嚇親自己及朋友，坦言老咗10年！最後全靠自己調整心態，從地獄逃回地面，努力面對自己情緒唔硬撐，見攰就唞吓。採訪：方騫平 髮型：Kenki Lau 化妝：Onetung Ma 服裝：CELINE 場地：The St. Regis Hong Kong
陳凱詠做了獨立歌手半年，繼年頭推出跳舞歌《百妖夜行的修行》，最近再有新歌《間歇性休眠》：「呢首歌比較sad，唱出無助及冤屈時嘅內心世界，人人都會有情緒低落時候，歌曲可陪伴有壓力嘅都市人，紓解情緒，正如歌詞都有寫『沮喪可以跳一場舞，起碼可以刮一場塵土』。」
與世隔絕自我療癒
自爆曾陷入抑鬱狀態的Jace諗起都驚：「情緒低落冇特定原因，應該係一路以來累積嘅情緒，冇即時跳返出嚟，嗰時覺得好無助，日日係陰天，冇人可以講，冇出路，冇方向，好沮喪，唔知點算好。」Jace更曾經試過持續幾個月辛苦到手震、口震、講唔到嘢、透氣困難，眼淚係咁流出嚟，「同平時樂觀性格完全唔同，唔再認識自己，連自己都嚇親，但又唔敢同父母講，朋友見我冇晒精神動力好憔悴，知我好唔妥，只不過我死撐話『冇事』。」最後渡過困境，全靠暫時摺埋自己，「情緒受困擾過唔到，索性與世隔絕吓，畀自己休息，寒冬過後又到春天！」Jace認為每人都會有情緒，小朋友讀書都會好辛苦，要學習點樣去面對，「有首歌陪伴好重要，《間歇性休眠》記錄低我嘅冤屈狀態，錄音前及錄音期間都爆喊。」
慳自己堅持做音樂
自我隱形一排後，Jace回歸樂壇，仲做埋老闆，乜都自己話事，做乜音樂類型都得，雖然有主導權，但有得就有失：「作為團隊隊長，乜都要重新學習及處理，尤其市場狀態不停變，日日面對嘅嘢太多，好多嘢都唔識，消化唔到個人會亂，所以會困惑又會攰啲，好似突然老咗10年，不過，半年間多咗10年知識都值得呀，ok唔慘喎。」冇咗大公司支撐，至今Jace自資出咗6首歌，事事需財，她強調金錢上仲頂得住：「我對數字唔係咁敏感，但總算經營到，做到想做嘅音樂，想嘅試嘢，有賴大家支持。」她笑說為堅持做音樂，會穩守成本及慳自己：「入行咁耐(5年)冇買過一個名牌包包，最貴個銀包7000蚊經已好肉赤喇，我唔重視物慾，好易得到心靈滿足。」
Jace對於重新「殺入」樂壇以游水作比喻：「游住先，探索下先囉，雖然中間有唔同嘅船隻嚟接我，可以快人一步埋岸，但𠵱家可以自由自在游去唔同島嶼，仲能夠踩住水曬陽光，可能會吃力及攰啲，係有啲攞苦嚟辛，唔踩反而唔知身體好呢，踩水經歷更能強身健體，唔使急於游埋岸喎。」
