黎彼得話星爺唔係好人 笑李龍基:唔屙尿照下個樣 收埋大量圈中秘料 做YouTuber爆晒出嚟丨獨家
發佈時間：07:00 2024-08-14
入行半世紀，74歲的黎彼得(Peter哥) 收埋唔少圈中秘史，遠古有閨密劉嘉玲、曾華倩、梅艷芳，近至富商馬清揚與港姐林鈺洧「行埋」都知。Peter哥逢星期四晚有個網上節目《玖噏秘笈》，以嬉笑怒罵形式大爆跟圈中巨星的有趣相處點滴，有張曼玉、吳君如，古天樂，甚至近期「新聞王」周星馳亦有提及。訪問期間提到李龍基，Peter哥爆Seed叫對方屙篤尿照下個樣，更笑他不自量力，非常搶口。採訪：方騫平 攝影：譚志光
《玖噏秘笈》由黎彼得自編自導自演，每集有不同主題，如「出軌」、「忘年戀」、「名人飯局」及「粗口文化」等，如同一本論盡五台山風雲的有聲書。Peter哥透露黃霑生前曾搵他出書，因為唔想變金科玉律，又怕跟被爆主角撞口撞面時面懵懵：「做呢個節目好處可以隨時執生，唔會寫死人。」
基哥不自量力攞嚟衰
提到忘年戀KOL李龍基，Peter哥一啲都唔可憐佢更忍唔住取笑：「應該整套《搭錯車》畀佢喊下。佢呢啲係自作孽，識件咁嘅嘢(王青霞)Day 1經已製造悲劇。」他狠狠叫基哥屙篤尿照下個樣：「佢憑乜執件『丁娘十索』？」語畢還認真分析：「王青霞仲未收經，中年婦人正常『大食』，餵佢唔飽咪收你檔囉。」他更嘲基哥：「唔通佢一日7次咩？夜尿就有，7日都冇一次啦！做人enjoy得嚟都要有本錢及能力，不自量力攞嚟衰，人貴自知。」Peter哥又睇唔過眼「兩公婆」大話冚大話，亂七八糟：「我哋唔同類型，對唔到嘴型，自己潔身自愛，做咗幾十年冇被投訴『鹹豬手』、抽水、欠債等，呢行傳得太快，要謹言慎行，衰一樣藝術生命就會冇。」Peter哥強調自己冇一夜情，還奸笑說：「好多人有，但又如何？好似『安心事件』咁，你(記者)可以訪問下我契仔黃宗澤有幾多個呀？哈…嗱講明我冇爆料呀，我知晒佢啲嘢咋。」
被張曼玉面責係賤人
Peter哥自言係「絕緣體」，劉嘉玲、吳君如、曾華倩「小花」年代，傾完心事見眼瞓，close到喺佢屋企瞓：「我屋企得一間房，大家會瞓喺好似劏房咁狹小嘅空間；當年吳君如為逃避『翁美玲事件』嚟住咗一星期，但我冇攞著數心態，身邊真係太多靚女，雖然我冇錢但有才華，你吹得我脹呀？」他甚至炫耀名字有個鳳字的型女影后跟男友分手後，執埋行李三更半夜去佢屋企過夜：「我冇『食』到，鄧光榮收到風，第2日打嚟寸我『噚晚嘥咗料喎！』哈…又係嘅。」除此之外，Peter哥拍戲時試過喺關之琳心口寫字；跟張曼玉亦有段故事：「當年我約佢飲咖啡搵佢拍戲，豈料佢聽到啲是非，好嬲咁面責我『你個人咁賤喺電台唱我…』幸而最後都和解，後來合作拍《富貴吉祥》，曼玉唔介意俾我揸patpat，仲話『大家都咁熟』」講到粗口文化，他聽聞有導演(已離職)曾開咪用粗口鬧初出道的佘詩曼：「你唔帶劇本，只係帶個X返工。係好侮辱，我哋見怪不怪。」
古仔拍劇冇影靠剪接
談及名人飯局話題，Peter哥同周星馳拍過《唐伯虎點秋香》、《破壞之王》、《武狀元蘇乞兒》等戲，亦多次跟吳孟達同枱食飯，他稱跟星爺從來冇偈傾：「同枱食飯各自修行，而且次次由達哥埋單…佢好cool、好mean睇唔起人，絕唔係好人，我唔睬佢，唔當佢係周星馳，所以佢唔敢對我憞起個款，只係無視我。」Peter哥坦言跟星爺冇可能再合作，「我都幾十歲，佢有乜畀我做呀？」另外，Peter哥同樣跟古天樂冇兩句：「當年拍TVB劇《尋秦記》時，古仔係當紅小生亦冇架子，但唔知點解大家冇乜話題。」他又爆返工經常唔見古仔：「劇組會話：『跳拍古仔，佢有病今日唔出現』，即使同佢有對手戲都各有各拍，咁佢有醫生紙，唯有跳拍佢啲戲再剪返去。」
