利穎怡狂鑽牛角尖匿埋喊足兩星期不甘主持《東張》被屈搏打吸收視丨獨家

更新時間：08:00 2024-08-17
發佈時間：08:00 2024-08-17

年前，36歲前「東張女神」利穎怡（阿忠）因採訪遇襲致壓力爆煲甩頭髮，及後調入劇組發展。近月，她與無綫結束12年賓主關係，轉投HOY TV。重提當日「鬼剃頭」事件，她承認處理唔夠成熟，亦因介意海量負評而鑽咗牛角尖，更試過匿埋喊足兩星期，深受委屈。採訪：方騫平攝影：羅安強

本月初，利穎怡火速上任主持HOY TV《一線搜查》，即使重返老本行，她形容都係一個挑戰，但肯定唔會再有被襲後陰影：「𠵱家大個女可以處理到，我向《東張》告別時，佢哋反而關心我仲有冇唔開心？」

壓力爆煲變「鬼剃頭」

回想兩年前被襲，利穎怡強調被打係其次，最唔開心被屈，俾網民瘋狂批評：「其實我都係盡力做好份工啫，點知俾人話我搏打吸收視，見到留言好愕然。」她更因此負能量爆晒燈，「呢段日子匿埋屋企喊足兩星期，去剪髮時再有雙重打擊，因為髮型師發現我有『鬼剃頭』，有個5蚊銀咁大嘅位置冇咗頭髮，我再忍唔住爆喊。」好彩喊能夠釋放情緒，總好過喺屋企胡思亂想鑽牛角尖：「不過都好，就係憑住呢鼓勇氣重拾初心做演員，調入劇組拍咗多部劇集，都唔係冇得著，尤其唐詩詠及監製文偉鴻指導我演內心戲；詩詠教我要感受每場戲，有feel自然能表達，好記得同佢拍《白色強人》時，詩詠見我眼有淚光，主動要求take咗我個shot先，真係好照顧我。」