劉偉恒有火力撐朱茵：點解要針住演員年紀 拍家居戲求逼真化淡妝被踩跌晒Watt丨獨家
發佈時間：07:00 2024-08-27 HKT
劉偉恒（Benny）執導及編劇的ViuTV劇《反起跑線聯盟2》，請到相隔14年再拍港劇的朱茵飾演老師，Benny大讚「冼老師」演出極專業，家居戲為求迫真，52歲的她堅持化淡妝着睡衣演出，但換來外貌被踩，戥對方非常不值。採訪：杜杜 攝影：朱偉彥
Benny表示《反起跑》一班演員感情極好，拍攝時已開了多個群組，之後亦保持聯絡兼不時聚會，到宣布開新一輯時一呼百應，「真係一個都不能少，唔係好難拍，好似Gigi（梁詠琪）本身冇期，但冇理由話佢離咗婚，佢好好，點都畀幾日期我哋拍。」而今次最難度期反而是小演員，「最難度高嘅係喺加拿大嘅『Martin』（植海維），同喺英國嘅『瑤瑤』（張曦晨），佢哋都即刻話飛返嚟，成個暑假畀我哋，好感動㗎！」
黃貫中拎蛋糕探班
講到難得請到朱茵演出，Benny大讚對方為角色花盡心思，「佢唔介意演所謂嘅反派，練咗個老師tone出嚟，又唔介意把聲嗌到爛晒，用重來冇用過嘅演繹方式呈現畀大家。」他更欣賞朱茵的專業態度，「好多場戲佢都要求唔好化濃妝，譬如喺屋企，佢話化濃妝瞓覺唔可能！同埋佢姨甥女『Julia』（李莉）失蹤嗰場，着住睡衣同拖鞋嘅佢落維園搵，堅持唔可能執返好個妝，嗰時維園人來人往。」對於朱茵被網民攻擊靚樣跌Watt，他大感不值，「話佢個樣點，我好唔開心，不如睇吓個演員用咗幾多努力去演呢個角色，點解要針住個年紀同樣貌呢？！人總有日50、60、70歲，絕不能攞返張閃咭出嚟比較。」
Benny又透露朱茵有帶囡囡黃鶯探班，仲目睹後者首見媽咪拍戲的畫面，「鶯鶯坐我隔籬，佢眼神好仰慕鏡頭入面個媽咪，覺得媽咪好厲害，呢個畫面真係好深刻。」他又爆朱茵老公黃貫中（Paul）亦有來探班，仲引起一陣哄動，「我係Beyond鐵粉，有日我哋拍到好攰，有個暖男突然攞住好多蛋糕嚟探班，原來係阿Paul，全場crew癲咗，個個走去集郵，佢哋呢家人關係好好，見面仲會又攬又錫。」
