黃心美劉明軒聽失婚同路人經歷聽到喊 產後主持《40路》獲激勵孫慧雪速減10幾磅丨獨家
發佈時間：07:00 2024-09-02
42歲的孫慧雪、黃心美及46歲劉明軒（Vivian），首次合作主持ViuTV選美真人騷《美麗40路》，3人表示一定唔敢參加大讚參賽者好勇，甚至被參賽者的經歷所觸動。失婚的心美及Vivian感受最深，後者更講到眼濕濕，而阿雪就受到一位單親媽媽的勵志故事所激勵，成功減肥10幾磅。採訪：杜杜 攝影：林賓尼 服飾:Born Diamond(阿雪)、alice + olivia by Stacey Bendet(心美)、LOVE BONITO(Vivian)
阿雪是監製和編審的心水選擇，招募宣傳片已由她拍攝，「網民話揀得好啱，覺得keep得好就符合《40路》主持嘅條件，我好開心又緊張，因未做過大騷主持。」心美於2018年離開ViuTV，一口答應監製邀請，之後又好擔心，「話晏啲send資料畀我，等到夜晚都冇，開始諗好多嘢，我口快快應承咗，但會唔會係叫我參賽？！打畀相熟導演先肯定搵我做主持。」Vivian收到監製message，更以為是電騙，「我識監製，但好長時間冇聯絡，又話我美魔女，有個節目主持要我做，係咪電騙嚟？！後尾監製再錄音畀我，聽到佢把聲就知真係佢。」但她最介意被稱為「美魔女」，「我以前報娛樂新聞年代，形容劉曉慶6字頭但keep得好靚先叫美魔女，但介意咗1秒啫！我有8、9年冇主持成個節目，一聽就有興趣。」
一致拒絕做參賽者
問到若然真的被邀參賽？3人表示會一口拒絕，最熟ViuTV真人騷運作的心美就解釋，「又唔知第1屆做咩，連獎品都未公布，有冇獎金又唔知，成個真人騷咁長時間，唔知會考驗你啲咩，《造星》有好多表演，事前又唔知，但今次唔算不停表演。」阿雪當時剛生完細仔Rian ，最擔心仲未修身，「我第1樣諗係要減肥，好多人都覺得搵得你去做主持，一定要有啲代表性，我好畀心機去減，但真係冇用㗎！睇佢哋瘦到呢！（無奈地望着兩位拍檔）。」Vivian即刻安撫：「佢第1日係脹啲，但每次見都縮咗啲。」怕要挑戰自己底線的Vivian就不敢參賽，「蜘蛛嗰part搞唔掂，真係好驚，揸住影嗰個參賽者其實好驚，但佢都頂到，我未必頂到。」
經常被參賽者觸動
節目中參賽者分享了很多經歷，阿雪被一個單親媽媽所觸動，努力減肥10多磅演出，「佢照顧晒小朋友，但係又有自己事業，各方面都keep得好好，好欣賞，特別體重管理，點解可以咁fit？！」她們坦認有時仲會聽到喊，心美說：「佢哋講經歷時久唔久彈句嘢出嚟，對我哋都有好處，明白人人都有呢啲經歷，唔係孤單。」單是參賽者自我介紹，心美已有感受，「問佢點解嚟參加，好多都話想嚟挑戰自己，有個印象好深刻，佢做太太同媽咪嘅角色太耐，終於為自己做返啲嘢，但又唔係為咗贏。」
心美唔諗拍拖結婚
Vivian亦被參賽者經歷打動，甚至Feel到痛，「真係嘭一聲打入我個心，有啲事有啲感受連繫到，知道佢當時情緒我都會痛。」Vivian更講到眼濕濕，「人生總有啲嘢好委屈。」心美認同：「因為經歷過所以明白。」離過婚的Vivian坦認聽到參賽者失婚經歷，感受特別深，「當然件事唔會一模一樣，自己都有啲委屈嘢好唔開心，但真係解決唔到，嗰種委屈屈埋喺心入面，真係要自己去消化再跳返出嚟，要自己幫自己囉！」問到同樣失婚的心美和Vivian對婚姻看法？心美答得斬釘截鐵：「冇渴望想拍拖，冇渴望想結婚，好享受𠵱家單身。」Vivian跟心美唔同，「我就未至於好渴望，又未至於心如止水，真係隨遇而安。」她承認經歷過一次失敗，擇偶條件有所改變，「拍拖時所有甜言蜜語，我都enjoy，但唔係好長久，反而兩個人嘅價值觀要配合，先可以走更遠，呢個要求其實係好高。」
