黎瑞恩演唱會丨與女兒又唱又跳掀全晚高潮 相隔6年再開唱感壓力怕粉絲唔記得自己 曾傳訊息慰問蔡一傑
發佈時間：14:45 2024-10-21
一連兩場的黎瑞恩《V Union恩賞．演唱會2024》昨晚（20日）於西九戲曲中心舉行尾場。黎瑞恩以全白女皇造型現身唱出《發誓》為演唱會揭開序幕，在唱出《多情》後，她表示：「有啲想喊，點解咁快嘅？」忍喊的她即擰轉身指不能看到觀眾，她表示已6年沒開騷，又問自己是否瘦咗，笑言：「我話晒都係一個玉女，冇肉又點做肉女？」除去外套時，她表示自己「真係瘦咗啲，冇呃你哋！」黎瑞恩指每次開騷也會收到很多花籃，但花籃通常只能放兩日就會掉，自己不想浪費，所以呼籲大家將心意捐到現場會撥捐給慈善機構的籌款箱。
Encore環節，黎瑞恩和女兒Sheree著上短裙現身一起跳唱《心急人上》和《美少女戰士》掀全場高潮。跳唱完後，黎瑞恩以「Mini小恩子」來形容女兒，她笑指女兒經今次後見媽媽好辛苦所以不會出道，會繼續讀書，隨後她又在台上「教女」，讓女兒叫人，笑言見到男士叫哥哥、女士叫姐姐，Sheree亦即醒目地說：「Hello 哥哥姐姐，多謝嚟睇媽咪演唱會，係咪做得好叻呀？」之後黎瑞恩更叫兒子一起上台，一家三口與粉絲影大合照，之後她又叫全場向她講「我愛你」。
當唱到《雲上的日子》時，黎瑞恩指這首歌是個人首次個唱的主題曲，不過開完後就沒得唱，到她唱的時候忍不住喊，搞到唱不到，粉絲也拍掌為她打氣，唱完後兒子即遞上紙巾，黎瑞恩哽咽地說：「隔咗六年，大家對我咁好嚟支持我，好多謝你哋。我諗大家有時可能會唔記得我，就好似呢個演唱會咁好大壓力，因為好耐冇見過人，估唔到尋晚同今日大家都咁熱情。每次做演唱會都當最後一次，因為今日唔知聽日事，唔知以後有冇機會再同大家唱歌。」
完騷後，黎瑞恩表示邀女兒上台主要是因為在家中練歌時，剛返港的女兒指識唱該曲，所以之後想到不如和她一起唱，她直言女兒很喜歡唱歌跳舞，之前也曾問她是否可以參加歌唱比賽，但她認為女兒要先完成學業後再想，而她指今次二人同台，也算是完成自己和女兒的心願，又笑指經過今次後，兒子與女兒也更崇拜自己，至於兒子則沒打算入行。提到她剛才忍不住喊，黎瑞恩笑謂已經好叻，因以前唱到第三首就會喊。
另外，對於好友蔡一傑剛做完切除腦部腫瘤手術，黎瑞恩指看報導後覺得震驚，她謂當得知他不舒服時也有傳訊息慰問，不過可能他不想大家擔心所以沒說，故自己也不知對方病情，問到會否去探望？她說：「佢喺美國做手術？不過好似返咗嚟，我哋畀佢好好休養，唔好搞佢，佢好返自然會出返嚟，希望佢快啲好返！」
