陳曉華唔肯認愛朱敏瀚等肯嫁先公告天下 37歲羅天宇心急搵老婆怕生BB距離遠 丨獨家
發佈時間：07:00 2024-11-06
陳曉華（Hera）和羅天宇拍《巾幗梟雄之懸崖》，兩人最開心能跟黎耀祥做對手戲，Hera更指祥哥和定欣改變了她的人生及工作態度，相當誇張。雖在劇中首演情侶，但兩人不擔心再傳緋聞，因他們各有「另一半」陳懿德和朱敏瀚。問到Hera跟朱仔的「婚訊」，她講明拍拖不會公開，但結婚必定會公告天下，相當耐人尋味。採訪：杜杜 攝影：譚志光 髮型:Hair salon@Martin(天宇)、hola(Hera) 服裝:HarrisonWong(天宇)、Alice and olivia(Hera) 場地:Velo Italian Bar&Grill
Hera和羅天宇首參與《巾幗》系列，更有幸跟黎耀祥和胡定欣合作，恨跟祥哥合作多時的天宇，更一度感動到喊，「真係期待咗好耐，啱啱入行睇佢寫嘅書，到《愛回家》有輯同套劇可能同佢合作，但最尾都係冇，我第1日同佢拍完，我係流眼淚。」他憶述當時情況，「喺橫店同佢拍喺餐廳對坐嘅戲，我係成套劇第1場仲要同祥哥，好緊張，喺內地拍嘢同香港好唔同，啲crew人數多好多，成個環境太新好大衝擊，拍完嗰場嗌cut，我就同佢講好高興同你合作，我就眼濕濕。」幸好祥哥冇畀他嚇親，「佢見慣世面，可能日日都有人咁。」
同祥哥定欣合作學到嘢
Hera形容祥哥平時唔聲唔聲，但只講幾個字卻舉出輕重，「個個都同我講，你喺祥哥身上一定學到嘢，但祥哥唔係成日出聲，唔會係咁塞啲嘢畀你照做，只會突然喺你身邊講4、5個字，而嗰4、5個字係會影響你一生。」她舉例子，試過問祥哥如何令演出有追看性，一直吸引到觀眾，「佢話『你要知道失去，先知咩叫珍惜』，我都失去過好多嘢，應該知咩叫珍惜，但拍完《巾幗》呢年，腦海成日彈出呢句，原來佢講嘅係同我唔同level，改變咗我好多人生諗法。」她認為祥哥不單做戲教到人，亦改變到人的人生態度，她在煞科宴聽到祥哥講話也感動到喊，「佢過去幾十年一定感染咗好多演員，只係同佢相處咗3、4個月，已改變咗我好多嘢，遇到呢個寶物真係太好。」
Hera跟胡定欣同樣是初次合作，她更搞笑向對方示愛：「我太愛呢個女人！」她愛前輩是學習的好榜樣，「我第1次同定欣講嘢，係觀察咗佢好耐，然後我同定欣講佢好犀利，點可以無論周圍發生緊咩事，都可以好穩定速度講嘢，好focus。」定欣演出水準對她影響很大，之後拍新劇《金式森林》有嘗試幻想自己是定欣，「遇到佢同祥哥，雖然佢哋冇乜點講嘢，但喺佢哋身上已經感受到好多嘢，令到我對做演員有新睇法，好想效法佢哋。」
講天宇朱仔態度差得遠
Hera和天宇首演一對，兩人更傳過緋聞，會否更易投入感情？Hera第1個反應竟是反白眼，搞到天宇投訴：「嫌棄呀？咩事呀？！」Hera笑着說：「熟悉先夠膽反佢白眼，唔會反祥哥白眼啦！對上套劇（《金式森林》）佢做我個仔，完全唔記得做情侶感覺，係我個仔就可以反佢白眼。」講到他們同遊日本緋聞，天宇就無奈話，「我哋一個去東京一個喺大阪，只係一齊去咗日本啫！」他笑着指不擔心再傳緋聞，「大家都有啲緋聞，所以唔擔心囉！」指的當然是他跟「東張女神」陳懿德和Hera跟朱敏瀚啦！對於跟天宇傳緋聞，Hera卻好不滿，「出咗呢啲會唔開心，好想大家留意返我工作多啲㗎！」她跟朱敏瀚傳出戀聞又會否不開心？她卻冧笑道：「我解釋得好清楚，了解中，哈哈！」態度明顯相反，連天宇都投訴：「感覺咁唔同，同我就唔開心喎，同人哋就好開心！」Hera就拉開話題，「都係得啖笑！（指12月結婚？）係呀！直頭話我有埋BB，哈哈！仲話我同居，嗰時我喺內地拍緊《金色》，完全冇時間返過香港。」
對於跟陳懿德緋聞，天宇大感無奈澄清，「唉！其實好多緋聞都係，總之一班人影相，呢個係女仔，靚啲喎，就寫佢哋啦！」被封「女神收割機」，他已好淡然，「百毒不侵，已經冇感覺！」他坦認心急搵結婚對象組織家庭「有小朋友嘅話，唔想太大年紀，𠵱家都37歲嘞，過多5年40幾，覺得好似距離太遠。」Hera早前提到5年後才會考慮結婚，她坦認因事業心強，加上愛情從來沒保障，「點解我會咁想focus工作？！因為呢樣嘢係值得投資，因為我都好理性，如果我係咁拍拖都唔work，好似浪費緊自己時間，如果同呢個人一齊咗，係咪可以同呢個人行到最後，如果唔係行到最後，咁點解要拍拖呢？！」所以她會花好長時間去了解一個人，再投入一段感情，「食個飯都可以睇到，又或者做嘢都可以睇到呢個人點樣，再諗清楚呢個人係咪可以結婚對象，先至投放自己落去，我覺得呢個係理性啲嘅做法。」不過若然走到結婚一步，Hera講明會公告天下，「唔會收埋，對於我嚟講人生一啲大嘅階段，讀書結婚，生仔，我都一定會同大家講，因為我會一定有好多感受，一定會長篇大論喺社交平台度同大家分享。」但拍拖會否公開？她就拒絕話：「對我嚟講人生重要階段只有結婚，同埋生離死別，拍拖唔算。」
