胡定欣拍《巾幗》壓力大有陰影：相都唔敢睇返 封黎耀祥做「QC祥」助執靚演出丨獨家
發佈時間：07:00 2024-11-21
胡定欣因鄧萃雯辭演《巾幗梟雄之懸崖》，要開拍前1個月頂上演「七爺」，準備時間不足，兼且《巾幗》系列屬「名牌」，令她壓力倍增，曾邊拍邊後悔，甚至拍完都不敢睇回該劇的相，連早前再着戲服都感受當時壓力。幸好能跟黎耀祥第8度合作，她更被祥哥為「QC祥」幫手執靚今次演出。採訪：杜杜 攝影：朱偉彥 形象:Queenie Yu 髮型:Matt Chiu@XENTER SALON化妝:Davina (Cyrus Lee Makeup Team) 服裝:Stella McCartney場地:Studio meta
定欣雖然已第3度演出《巾幗》系列，但依然覺得很難掌握編審張華標的劇本，除了要重複去睇劇本，還要搵跟標哥多次合作的祥哥一同研究，「尤其是睇劇本嘅時候，因祥哥比較熟悉同理解標哥寫嘅劇本，佢有演過作為男女主角嘅崗位，有經驗去帶領住成個劇，雖則我第1、2次都有份演，但當時都係個小角色，未需要承擔咁多，所以睇劇本或者去理解時會產生好多疑問。」拍攝時除時間緊逼，跟祥哥的爭論戲亦有一定難度，「係其中一part最大挑戰，同過往幾套演嘅女強人，不論故事情節或者劇種，未必需要表達情感去到咁高level。」
曾懷疑自己後悔接拍
《巾幗》系列已成為「名牌」劇集作品，定欣坦承由接拍到宣傳不同階段都有壓力，「啱啱大眾知道我去接手拍呢個角色時，有當刻嘅壓力，去到拍就面對自己演出嘅壓力，去到出街開頭係期待多啲，去到真係要播嗰日，突然間就好緊張，會諗觀眾嘅評價或者反應係點樣，到𠵱家都播咗一大半，放下咗呢份擔憂，呢套戲畀我嘅經歷同感受實在太多。」她更自爆在拍攝中途，一度後悔接拍，會有懷疑自己的負面情緒，「戲裏戲外，我都有好多情緒嘅波動，某啲階段都有出現過一啲負面嘅，反問自己今次接呢個角色係唔係一個正確決定呢？壓力大時就會咁諗，我係咪好傻呢？係咪唔應該咁做？係咪點樣做都唔會被認同或者唔會有人鍾意睇？」不過她最終都能掉低壞情緒，可惜原因好無奈，「唉！因為聽日仲有好多場戲要拍，快啲努力睇好啲劇本，唔好諗咁多無謂嘢，冇咁多空間去諗，諗辦法做好就係最好。」
未有想憑「七爺」爭視后
入行超過20年，定欣今次拍《巾幗》是壓力最大，負面情緒最多，甚至拍完作品後仍有陰影，「拍完嘅大半年時間到播出街，我都唔敢同唔想睇返呢段時間嘅相，因每次睇返都會諗起嗰個壓力。」她就連早前為劇集做宣傳，穿回一場「七爺」除衫叫「柴十七」做3日自己的鬧交戲服，心情亦受影響，「點解呢段戲我咁鍾意，因為戲裏戲外都有嗰份壓力，係好有重量，只不過係件白色喱士衫，前幾日商場宣傳着，都令我諗返起拍攝時嗰個壓力，淨係着嗰件喱士衫咋喎！」《巾幗》系列過往令不少演員得過獎，但她今次未有想太多，「觀眾嘅反應大於一切，真心希望觀眾鍾意『七爺』同『柴十七』嘅發展、感情，大家講聲好鍾意，已經好開心。」
跟祥哥恐難再有合作
講到第8度跟祥哥合作，《巾幗》系列亦已第3次拍檔，定欣認為是個很難得的緣份，「10幾年前喺呢個系列我演『海棠姑娘』，誰想到10幾年後有機會擔當呢個系列女主角，同祥哥演返呢個系列第4個故事，原來同呢個系列有個好奇妙嘅關係或者緣份，亦都同時間係跟祥哥嘅緣份，可以去到咁樣，第8次合作都仲要係拍《巾幗》喎！」今次能順利演出，她慶幸有祥哥傍住，「我仲有呢個智囊團、QC喺我側邊，QC祥呢個名都幾好，哈哈！佢係好清楚，呢個劇或者標哥嘅劇本要點樣去演，先可以達到嗰個效果，我係要同時間交學費。」不過她坦承跟祥哥未必再有第9次合作機會，「當然我唔可以替佢講說話，但佢傾偈時講，拍埋呢套劇都未必再拍劇，佢暫時都想做吓戲劇以外嘅嘢，拍吓飲食節目，做吓直播，開開心心同阿嫂遊山玩水最舒服，可能佢已經創造咗咁多經典角色，令到佢暫時有咁樣嘅選擇。」
