Twins北美巡演丨蔡卓妍生日獲靚仔獻pat任打笑唔停 鍾欣潼到加拿大感暖心：飲到老豆屋企煲既湯水
發佈時間：19:15 2024-11-23
Twins最近忙於北美巡演，剛完成溫哥華站，適逢蔡卓妍（阿Sa）的42歲生日，她由香港出發已經狂收歌迷蛋糕、禮物，一直收到溫哥華、多倫多，又獲鍾欣潼（阿嬌）及工作團隊慶生，並與溫哥華家人朋友食飯慶祝。
阿Sa感恩又大一歲
Twins昨日（22日）來到多倫多尼瓜拉瓜大瀑布，適逢阿Sa正日生日，大隊一齊到日本餐廳慶祝，阿Sa今年踏入42歲，工作人員更將蛋糕上的數字改為「24」，但阿Sa就非常正面地把蠟燭調番轉，「你睇下我個人幾誠實！哈哈。人係會長大，假如今日我停留喺24，大家就再見唔到我啦。我極度開心自己一年大一歲，證明我健健康康快快樂樂地活着，好好享受生命每一刻！」日本餐廳的服務員更主動為阿Sa跳舞慶生，還有靚仔叫阿Sa拍佢pat pat，又想拉她跳舞，嚇到阿Sa狂笑不止，十分搞笑。
阿Sa吹足7個蛋糕
今次巡演，Twins異口同聲表示覺得份外珍貴，笑言：「年紀愈大就愈覺得張學友，劉德華佢哋好勁，60幾歲重唱成百場，我地兩個60幾歲都唔知會點，歌迷都或者湊孫，唔得閒理我哋啦，所以好期待今次每一站見到唔同地方嘅歌迷，好珍惜每一刻相聚！」壽星阿Sa亦表示，「由香港機場到依家，已經吹咗7個蛋糕，有啲係歌迷親手整，有啲係朋友送。今年生日好特別啦，因為時差關係，有兩日呀。感恩自己今年做咗好多嘢，雖然好忙 但係好充實嘅！希望嚟緊呢一年，身體健康 繼續有無窮無盡嘅精力，工作之餘 仲可以去多啲旅行 Work hard, play harder！多謝大家嘅生日祝福，我收到晒！」
阿嬌坦言觀眾反應超出預期
至於Twins SPIRIT演唱會一直都是四面台，到溫哥華開始變三面台，兩人都暫未習慣，經常有很多蝦碌發生，例如走錯位、行錯方向等。溫哥華站兩人落台跟觀眾握手，更引起全場瘋狂、群情洶湧，但阿Sa冇有怕︰「之後還有大西洋城、拉斯維加斯、然後英國倫敦！唔怕啦，其實我係一個幾鍾意同觀眾握手嘅人，因為每一個近距離握手觀眾，都係四萬咁口望住你，都好開心㗎，好似大家互相交換開心能量咁，好正！」阿嬌就表示：「好耐無嚟加拿大，見到朋友仔好開心，仲飲到老豆屋企煲既湯水，好暖心。觀眾反應都超乎自己預期啦，咁耐無嚟大家都咁熱烈，都好開心。」
