林夏薇太入戲靠燒「卓慧雲」個名抽離 首演大反派畀老公狂鬧「你好壞」丨獨家
發佈時間：07:00 2024-11-27
林夏薇在《黑色月光》首度挑戰大反派「卓慧雲」，「黑化」過程令觀眾心寒，但薇薇大讚拍攝過程好玩，但她因入戲太深，拍攝期間變得生人勿近，她拍完要靠燒了「卓慧雲」個名正式道別，才能成功抽離。不過看到觀眾反應好，特別是睇戲好投入，堪稱「最佳觀眾」的老公莫贊生（Jason）狂鬧「你好壞」，所有辛苦都值得。採訪：杜杜 攝影：朱偉彥 髮型:Hair Culture Seiko 化妝:江中平化妝室Faye Chow 飾物:Flourishan 場地:Studio meta
薇薇恨演反派多年，得知在《黑》劇有機會演「卓慧雲」時特別興奮，「第1次嘗試去演反派，一路都想演，係許願成真嘞！真係好想試啲唔同類型角色嘅感覺。」由於「卓慧雲」跟她本人零相似度，演繹起來特別困難，「以前嘅角色會搵到少少共通點，『卓慧雲』係完全冇，係好特別好新嘅嘗試，因為林夏薇絕對唔會咁，睇返啲片都覺得當時點解會有呢個狀況，一定係畀『卓慧雲』上咗身，我嗰段時間真係有種上身感覺。」
入戲如上身變了樣
畀「卓慧雲」上身後的薇薇，現實生活也變得生人勿近，「我私底下係好開朗好正能量嘅人，嗰段時間係橫跨農曆新年，本嚟我係好注重新年氣氛，嗰時直情係六親不認，又唔畀人嚟拜年，又唔去拜年，屋企所有人都好驚我，就算化妝師都覺得我個眼神變咗，由內而嚟嘅眼神同平時嘅林夏薇兩個樣。」以往她試過為專心演好角色，跟老公分房瞓，今次情況更嚴重，「今次冇話特別要分開，但係我全個人係分開咗，好似與世隔絕咗，靈魂好似出咗嚟，屋企工人姐姐都好驚，我喺屋企又唔講嘢又唔笑，感覺好陰沉，𠵱家睇到個劇工人就明，嗰時發生咩事。」不過 Jason卻好習慣，老婆每次為角色會變成另一個人，「佢慣咗我呢種狀況，好多謝屋企人嘅包容，演員都係黐黐哋線，要好喺戲劇狀態入面，辛苦佢哋，唔使拍劇就陪多啲佢囉！」
要同角色做告別式
薇薇覺得拍攝過程好玩，特別是「黑化」後的情節，「慢慢去到所有人都為敵時，嗰種戰鬥力係好強，演呢個角色時候好虐心，但係都好爽。」亦因為太投入角色，她一度好難抽離，「演嘅時候好多場戲印象好深刻，去到大結局有場拍完後行出個景，成個人崩潰喊到停唔到，導演同茜堯走過嚟攬住我話『冇事冇事拍戲咋』，我都知係拍戲，但係嗰吓我都需要抒發，爆發晒啲情緒出嚟。」她認為演「卓慧雲」最困難是情緒要保持低沉狀態，拍完要跟角色進行「告別式」，才能成功抽離，「拍完後有好長時間喊唔到出嚟，係好難受好壓抑，我未試過一個角色，演完後要正式做個儀式道別，但係『卓慧雲』係要，我要搵張紙寫佢個名燒咗佢，我哋要暫時bye bye，我太入戲嘞！」
首演床戲最難演繹
薇薇除了跟楊茜堯繼《收規華》後相隔9年再合作外，跟郭峰、王浩信和馬志威都是初次合作，大家合作都相當有火花。不過她認為最難處理是跟馬志威和王浩信的床戲，「呢個係我最驚，我冇拍過呢類戲，要我去做啲情感波動係一種難度，呢種又係另一種難度，好多謝佳導（鍾澍佳）佢親自示範，佢做我個位，同兩個男士去試戲，哈哈！」問到劇中性感睡衣事前有冇畀老公過目？她竟然話是跟老公一齊揀，「嗰套衫係我自己買，咁啱我同老公去美國做嘢，我睇咗劇本有呢場戲，專登搵有冇啲適合嘅衫，所以佢知道有呢件衫。」她又強調拍親熱也不用問老公意見，「我唔需要同佢申請，佢知道有呢啲場口，我係個專業演員，佢都知道老婆係個戲癡。」他又大讚老公是個「最佳觀眾」，「佢係好代入嘅觀眾，今次睇佢猛話『你好壞，你點解會咁壞』，嗰時睇《收規華》，佢睇到好難受會失眠，因為見到佢老婆好慘，又畀人賣去妓寨，哈哈！佢係真個好好嘅觀眾。」
