黃智雯搞網上真人騷歡迎行內人講「故事」 訪尼泊爾啟發策動正能量丨獨家
發佈時間：07:00 2024-12-02
41歲的前黃智雯（Mandy）大半年前跳出TVB舒適圈後，突破自己作出新嘗試，除首度隨國際培幼會慈善探訪外，更開設YouTube頻道，拍以追夢、勇氣、夢境成真等題材的真人Show企劃，宣揚正能量。煥然一新的Mandy形容現在好開心，每日都有新事物探索：「我希望收集大家嘅『故事』，積少成多感染唔同嘅人！」Mandy甚至歡迎圈內人講「故事」，並會盡力配合夢境成真。 採訪：方騫平 攝影：朱偉彥
月前黃智雯前往尼泊爾參與慈善探訪，親身了解當地貧苦家庭、婦女遭遇人口販賣及童婚的經歷。Mandy重提難忘片段，她首推販賣人口的真人真事：「受訪媽媽要獨力撫養幾個子女，因而被不法份子唆擺去咗科威特打工，其實被騙去做廉價苦工，遭傭主囚禁及虐待，直至半年後偷偷打電話返尼泊爾向女兒求救，隨即由培幼會支援青年小組營救，不過，喺逃脫過程如同電影情節咁驚心動魄。」Mandy更隨隊到接壤尼泊爾與印度邊境關口，深入了解當地人口販賣的真實一面：「培幼會會截查過境少女，追問動機，仲會設資訊站提供防騙資訊。」
反思別將煩惱事放大
此行Mandy到偏遠村落探訪時被6歲女童真情打動成為助養人：「小女孩生於貧窮畜牧家庭，生活環境惡劣，平日食扁豆飯，每月只能吃一次肉類，連營養都唔夠，但佢好樸素簡單，保持住天真無邪，隨手執起乜就玩乜，又愛讀書，深信受教育就會有未來。」Mandy受到啟發說：「我哋生在福中，要乜有乜，相比佢哋連基本生活都冇，要借錢買書桌及文具，但仍保持生命力，勇於改變環境，挺身重整人生；反思自己喺生活中，就算有少少跌跌撞撞，都唔好將煩惱事放大，即使遇上難題都唔好放棄，能夠改變心態，所有問題自然迎刃而解。」
獲公司支持發掘題材
大受感動的Mandy自尼泊爾之行後，決定為年輕人及社會做點事：「我會喺YouTube頻道製作真人Show，希望收集投稿者嘅『小故事』，帶出珍惜嘅訊息，甚至希望幫到佢哋填補人生遺憾，分享畀更多人聽……即使係圈中人嘅『故事』都無任歡迎。」Mandy認為，單憑藝人的小小力量，未必對件事帶來重大改變：「但希望喺少少互動中能為對方帶嚟回憶，點綴生活，我覺得好有意義，呢個係我嘅初衷。」現階段的Mandy形容好開心：「𠵱家優勢係自由大咗，可以做主導，獲公司支持一齊發掘題材，百份百投入做啲獨特性強嘅嘢，而唔係好似以前日以繼夜嘅拍劇模式，咁樣會少咗空間畀演員消化及沉澱，其實演員係需要喺生活上摸索嘅。」Mandy堅持人長大了，不同階段會有不同轉變，放開些試新事物未嘗不可，反而做人母就要順其自然：「呢方面好隨心，亦唔抗拒，不過暫時以工作為上。」Mandy笑言暫時湊住胡杏兒3子，仲會做愛犬好「媽媽」。
