尹光放低40年心結大平反：唔係鹹濕歌王 80歲跟軒公同Level獲博士丨獨家
發佈時間：07:00 2024-12-06
多得AI版尹光，80歲尹光(光B)人氣急升多了人留意，尤其是年青人，光B不時在街上被瘋狂「集郵」，今年初他更憑《Dear Myself》首次跟張敬軒同Level出戰商台《叱咤》，兩人又「前後腳」，獲法國北歐大學頒發榮譽博士。「升呢」做呂博士(原名呂錫揚)的光B將收埋40年的鬱結不吐不快，自爆曾當街被罵是唱鹹濕歌的歌王，時至今日仍耿耿於懷的光B說：「我梗係介意啦，好唔舒服嘛！」 採訪：方騫平 攝影：譚志光
承接《Dear Myself》聲勢，尹光推出新歌《命硬八十》唱出心聲：「其實我條命都幾硬，即使遇上唔如意嘅事跌低咗，會同自己講『唔好驚，爬返起身繼續做過。』除人生會有起跌，唱歌都係一樣，好似舊年咁食住『AI尹光』風潮突然好多嘢做，年中工作量回落，咁冇嘢做咪去玩下囉，最近都去咗2、3次旅行。」
帶動娛樂成香港icon
光B強調這樣的年紀不再講錢：「搵幾多錢都冇用，帶唔到落去(棺材)，得閒咪去玩下囉！夠飲夠食就算，但我唔會退休，因為命硬鍾意繼續做嘢；我亦唔使要太多榮譽，最重要身體健健康康，保持到把聲唱多啲好歌帶畀大家歡樂，最想做一個慈善演唱會，我一個仙都唔收回饋社會，不過，原來好難Book到場。」光B形容而家日子安安定定，是人生最開心的：「有老婆、有兒孫經已冇乜遺憾；年初時《Dear Myself》仲打入商台《叱咤》『我最喜愛歌曲』5強，人生一路一路咁起飛，甚至法國大學都畀博士學位我就更加開心，博士唔係咁易攞，尹光邊有資格攞呀？但校方覺得尹光係香港嘅icon，會唱粵曲、國語歌、rap歌及講下gag，帶畀老中青好多娛樂。」尹光最覺榮幸是，2017年時法國大學也曾頒過給張敬軒：「佢個『朵』咁大應該攞，我都有份攞咪開心囉，既然攞個博士位就要更加勤力。」
《2023年度叱咤樂壇流行榜頒獎典禮》尹光壓軸出場。
被當街指罵勁尷尬
「升呢」做呂博士後令光B內心鬱結也解開了，他有話申訴：「以前啲人批評我唱鹹濕歌嫌我市井，但𠵱家我連博士位都攞到，你話我粗唔粗俗呀？我根本就唔係粗俗，我啲歌係諧趣及踩界，香港人及全球華人都鍾意聽諧趣嘢，有時踩少少界係好聽啲㗎嘛，成日文縐縐未必係好，正如睇大戲都有個丑生，我咪係嗰個丑生囉，我鍾意唱啲輕鬆歌畀大家聽，但文縐縐一樣掂，因為我識做大戲唱粵曲。」雖然光B唔敢講係吐氣揚眉，但坦言個人係upgrade咗好多：「至少多咗好多年青人鍾意聽我啲歌，甚至帶動埋佢哋聽返我好多舊歌，包括80年代我創作嘅《荷里活》、《數毛毛》、《雪姑七友》等；就連TVB嘅劇集《荷里活有個大老千》都改咗《荷里活》歌詞做主題曲；《Dear Myself》更係內地學校嘅教學歌。」
做得唔好就要改進
因為曾被標籤唱鹹濕歌，尹光自爆喺初出道時，多次俾人兜口兜面話，好難頂：「試過好多次被大聲罵『呢個唱鹹濕歌㗎！』惹來途人目光，當時我好尷尬，唯有快啲閃…梗係介意啦，個心好唔舒服嘛…最慘為搵食不能改歌路；而家反應就唔同咗，佢哋見到我會話『尹光《Dear Myself》好嘢呀！』」另外，曾有一間百貨公司顧客喺「顧客心聲」中表達，不滿分店經常播放MIRROR、尹光等歌手的歌，唱了60年多歌，識玩嘅光B說：「唔好理人識唔識貨，既然話得我，做得唔好咪自己改進下，『曹操有知心友，關公都有對頭人』啦，不論幾好都會有人針對，大家要睇開啲，呢行有彈有讚，只要讚多彈就唔好介意。」
