張啟樂自揭靠免費做電台主持2年捱出頭 首奪金鐘獎感激港人冇忘記兼送鼓勵丨獨家
發佈時間：07:00 2024-12-09
張啟樂（Ben）定居台灣5年，由零開始在當地發展演藝事業，最近終捱出頭，憑主持中央廣播電台節目《台味超有港》，奪得廣播金鐘獎生活風格節目獎，成為首位港人得到台灣廣播最高榮譽獎項。Ben在台灣親自拍片跟本報讀者分享喜悅，自揭由免費主持電台節目2年，到得到獎一段不可思議經歷，「呢個經歷好精彩，用錢都買唔到！」採訪：杜杜
Ben奪獎後最開心得到好多港人支持和鼓勵，而且反應之大令他份外感動，「發現好多香港朋友冇忘記到我，有啲人話你以前做亞視、RoadShow（路訊通），又拍過過《開心大發現》、《情陷夜中環》，甚至有朋友記得我做過《粵講粵好玩》，仲自創口頭禪『不得之了』，做《開心大發現》又創咗『犀飛之利』，以為冇人記得係我創造出嚟，見到有留言咁寫，真係好開心，一直以嚟支持我嘅香港朋友，衷心多謝你哋。」
感激前亞視經理人搭路
講到決定到台灣發展，Ben早在2007年因拍戲認識當地朋友，之後朋友越來越多，加上喜愛台灣文化，2010年開始1個月起碼會到台灣1次，「最高峰試過1年去台灣20次，1個月來回香港台灣4次，甚至今日由台灣返聽日再飛都試過，10幾年來慢慢了解同認識呢個地方，越來越覺得適合自己，好想喺度發展。」不過他當時在港一直有工作，沒有扚起心肝實行，直到2019年8月他有感在港工作量大減，到台灣探望本身是台灣人的前亞視經理人林文華，向她訴苦，「佢話既然𠵱家冇嘢做，咪試吓過嚟發展，佢識咁多台灣娛樂圈嘅人，我又識咁多，咪試吓有冇公司願意同我合作，再申請工作簽證。」後來他搵到製作公司合作網上節目，再加上他過往20年演藝圈經歷去申請工作簽證，「點知畀我申請到3年，因呢個工作簽證就攞咗3年居留，從此展開咗喺台灣發展嘅契機。」他很感激文華為他搭路，留台首年已接到電影《金不厭詐》，「係套台灣本土電影，仲要係第2男主角，係文華介紹我畀導演去試鏡，先得到呢個角色，如果唔係我唔可以留喺台灣發展。」
靠美儀思浩帶入廣播界
Ben在台發展日子主要做幕前，先後拍了4部電影及4部電視劇，又不時參與電視台綜藝節目，而能夠踏入廣播界，就要由他2012年被亞視炒魷說起，「江美儀非常有義氣，二話不說就介紹咗我畀梁思浩認識，佢哋當時喺數碼電台主持《大家真瘋騷》，我就由2013年做到2016年，呢段時間畀我學識點樣運作電台節目同做主持。」2020年他突然收到電台舊同事、直播室控制員Melody電話，原來有台灣電台主持金寶透過當地新聞，得知他背景就想搵他拍檔一齊主持《包公出差中》，「嗰時我乜嘢都冇就梗係點頭啦！節目逢星期日晨早6點鐘做，亦都唔怕同大家講，我做節目係冇錢，因為嗰個廣播時段係我拍檔想做自己節目，所以係冇酬勞。」而2022年該電台有個閩南話節目嘉賓臨時甩底，節目負責人透過金寶搵他幫手，他二話不說答應，種下有自己節目的契機，「唔知係咪嗰次合作好愉快，或者我都表現唔錯，1年後2023年6、7月度，呢位搵我做嘉賓嘅主持做咗電台管理層，想搞啲新節目就諗起我，先有機會做到呢個得獎節目《台味超有港》。」
太太家人給了另一個家
Ben回想這5年經歷，最初確實艱辛，但亦慶幸有這段日子出現，「最困難一定係頭1年，又疫情又由零開始，所有嘢都係要自己闖出嚟，過程當然係辛苦，但呢個經歷又好精彩，用錢都買唔到，唔係有呢啲經歷，唔會有今日嘅一切，所以就算係辛苦我都開心，都感恩。」講到在台最大收獲，肯定是透過朋友認識到另一半。他跟太太這段緣份，可能因大家背景有點相似，太太疫情前在日本工作，「太太一個人喺異地工作同生活，比較明白我嚟到台灣呢度生活感受，佢當時好照顧我。」2年前結婚，他感激太太令到自己真正感受到台灣是另一個家，「佢啲屋企人對我完全接納好包容，等我喺呢度都可以有個家，有家人去互相扶持，互相照顧，令我更加安心闖我嘅事業。」而他認為得獎後一切沒變，只會比以前做得更加好，「知道節目嘅人多咗，聽嘅人多咗，要更加努力做好個節目。」
