谷祖琳讚劉青雲床戲超專業：唔知佢尺度咁勁 爆「老公」同女仔傾偈會變話題終結者丨獨家
發佈時間：07:00 2024-12-11
谷祖琳跟劉青雲相隔15年在電影《爸爸》中再合作，戲中飾演恩愛夫妻，她大讚平時在片場唔多出聲的青雲，為建立「夫妻情」好努力跟她混熟，可惜唔多識同女仔傾偈，經常變話題終結者。講到兩人有場激烈床戲，小谷話事前他們完全零溝通，更不知青雲會有超出專業尺度演繹，到現場青雲除下浴袍才知咁勁。採訪：杜杜 攝影：譚志光 髮型:Joe化妝:嫻仔 場地: 212 Studio
努力營造「夫妻情」
小谷跟青雲自2009年《撲克王》後再合作，小谷認為青雲很努力跟她，望盡快建立「夫妻情」，所以在拍攝現場轉變很大，「今次佢開工好nice，因為佢通常開工係唔講嘢，喺呢套戲就冇呢樣嘢，係咁撩人傾偈，但係啲topic錯晒，哈哈！」她舉例化妝時跟化妝師吹水，青雲亦嘗試努力搭嘴，「我同化妝師講我唔鍾意條眉咁粗，太粗唔知點，跟住佢加把口話，『呢個我明吖』，跟住我望住佢條眉係勁粗，就明佢真係想切入個話題，但係佢係個話題嘅終結者，哈哈！」她笑指「老公」𠱁細路還可以，但跟女仔溝通就完全唔掂，「佢又會無端端問我『小谷你屬咩㗎』，我話『你唔會問個女演員屬咩㗎』，佢可能諗我係咪開嗰味星座、八字，feel到佢係搲水吹，佢同小朋友係冇問題，但係女性溝通比較弱，我話『你真係好少同女仔傾偈嘞』，有啲男仔同女仔傾偈好叻，證明佢真係好好丈夫、好好巿民劉先生，但同女性談話係話題終結者，但佢係好可愛，好想用心去溝通。」
拍床戲完全冇壓力
電影以2010年「荃灣享和街弒母殺妹案」作為故事藍本，戲中小谷演的「胡金燕」，慘被患有思覺失調的兒子殺害，這情節一度令她「縮沙」，因她本是易驚「體質」 ，「之前做靈異戲都會驚，都係頂硬上，電視播睇返都會諗點解我會夠膽做呢啲戲㗎？！我好容易驚，好多恐懼喺裹面，要了解自己點解驚，就要接呢個角色，要去面對呢樣嘢。」反而跟青雲的大膽床戲，小谷完全不擔心，因2001年拍《野獸之瞳》早已有經驗，「我入行第2套戲就係《野獸之瞳》，嗰次後都有少少免疫，一啲都唔驚唔擔心。」不過她想不到當時作為新人矇查查拍牀戲，竟然今次情況會差不多，「當年我因為太新，知得越多就越衰，佢哋都係好人家嚟，唔係想𠱁我去拍啲咩。唔知我命運係咪咁，我拍親啲床戲都唔係好知，冇去傾，可能導演就係要我呢樣嘢，唔會畀好多準備我。」
翁子光做溝通橋樑
小谷跟青雲拍床戲事前零溝通，最終分別透過導演翁子光取得共識，「大家喺大嶼山拍最尾嗰場沙灘戲，佢好似有啲嘢講，但係又唔好意思講咁，我就打電話畀導演，叫佢同劉先生講嗰場戲唔需要就住，我係唔介意，因為劉先生係好gentleman，我同佢啲戲好親密，每次cut機佢會即刻彈開。」她當時跟翁導溝通後，認為這場床戲必需達到一個效果，「我係用咗個字intense，我唔係要理露幾多，或者動作係點，總之兩個人係要緊密程度係要好濃，劉生不約而同同導演都係咁講，咁就掂咗。」由於事前沒跟青雲傾過這場床戲，埋位時才知對方尺度，「唔知佢個尺度咁勁，我冇諗過劉青雲會咁樣，佢埋位前着住件浴袍，佢話『你唔會估到我有幾專業』，我話『係呀，得你專業我夠專業啦』，但佢一除浴袍我話『你贏咗，你專業我輸』，佢真係好專業。」
用放養式教導女兒
電影講到父母跟子女關係，小谷謂一直不會「敦」起媽媽款對待囡囡，所以跟現在分別12歲的劉心和10歲的劉悅關係極好，「當然𠵱家佢哋teenage會有啲問題，開始嚟料，每日喺度學習，暫時佢哋乜嘢都肯同我講，已經OK。」她自爆本身性格屬放養式家長，間接形成跟囡囡有好溝通，「我唔係特登㗎！我真係唔係太care成績，我唔係虎媽得離譜，哈哈！我直情話如果你真係唔想讀書，真係唔好返學，係勸返佢轉頭，唔好嘥自己時間，讀書唔等如就成功㗎！佢哋仲反而懷疑𠻹，個個朋友都讀㗎喎！」她強調這絕非激將法，「我同佢哋講，唔專心千祈唔好補習，補習好貴，唔想咪嘥時間，佢哋知我真係會cut晒啲嘢，佢哋咁大個人，知道有啲嘢真係要做，反而逼佢咪唔做囉！」
