秦煌兩度跌倒入院 轉臥床便溺：唔怕冇尊嚴 回復精靈興奮期待二月80大壽 丨獨家
發佈時間：07:00 2024-12-31
79歲行動不便的秦煌入住護老院半年，最近卻兩度跌親，傷及頭部及盤骨送院，身體狀況令人關注！現已痊癒的煌哥眼仔碌碌回復精靈狀態，還不時笑住高舉勝手勢影相。不過，兩次意外後令林院長十分緊張，院方不放心他再單獨去廁所，現在於80呎的單人房內加添了小便桶；大便就在床上瞓住屙，煌哥放鬆道：「呢度院友全部係咁，唔會冇尊嚴。」 採訪：方騫平 攝影：朱偉彥
近日天氣轉冷，然而住在護老院的秦煌身心都溫暖，除獲子女定期探訪外，院方將「明星院友」由原先住開的布簾大房，「升呢」搬到80呎VIP獨立單人房，房內有冷氣、暖爐、還有床頭櫃及飯桌，煌哥於床頭櫃上放了私伙迷你電視；連衣櫃都是私伙嘢，由煌哥自掏腰包花了$300添置，將衣物放得整整齊齊，牆身則貼出多張他的經典劇照，包括《射鵰英雄傳》經典角色「周伯通」，居住環境算是舒適，煌哥說：「單人房全院僅得一間，月租本要2萬，但院方好好畀我入住。」煌哥指，女兒幫他申請到政府資助，經已買到老人院宿位，每月只須付$1600，而他依然有$4,000綜援。
精神健康算OK
剪了短髮的秦煌換上長袖衣服精神爽利，他笑住舉起勝利手勢，然後「選擇性」交代出事經過：「當日去廁所時，唔知點解雙手唔夠力支撐，坐落馬桶時就跌咗落地，跌親嗰一刻痛到大叫求救，真係好驚呀！好彩骨冇裂，只係花咗少少，醫生要求我留院瞓床20日，但醫院夜晚冇人理我，住咗10日自行申請離開。」帶點固執的煌哥解釋說：「食咗止痛藥都唔再痛，應該冇乜大礙啦，否則醫生唔會安排半年後先返去覆診啦。」至於另一次意外在房內發生：「因為起身去廁所，踢到廁紙膠袋跣親，個頭撞埋牆角流血送院，照過磁力共振話冇事。」問到兩次意外時間？煌哥只推說是好耐之前的事，但那日出事就不記得。問到受傷時有冇慨嘆家人不在身邊？他表示子女有他們的屋企，一直都不在身邊。住了4間醫院的他，堅持返院舍最好：「出返嚟食得好啲，瞓返夠就精神爽利，乜事都冇，𠵱家感覺仲好過以前，精神健康好OK，最緊要對眼精靈。哈...我食得、瞓得、屙得。」他指發黑雙腳的傷口已轉好，心臟也沒問題，唯獨過重行動會辛苦些。
用尿片唔舒服
經歷意外後，煌哥嘅大小二便都轉入房內進行：「𠵱家床邊設有小便桶，『開大』嘅話瞓喺床度屙，由職員先喺床上鋪好膠布，屙完由佢哋嚟執手尾。哈…我又唔係日日有得屙『大』，隔3-4日一次。」煌哥隨即否定這樣會失去尊嚴：「咁過程中又冇人睇住我嘅，呢度院友全部係咁㗎，我反而接受唔到，長時間着住屙咗幾篤尿嘅尿片，咁樣會唔舒服，𠵱家咁樣解決都OK，叫我入返廁所反而唔多習慣。」
懷念內地情人
原來秦煌冇通知內地情人Mary跌親：「最近佢有微信我，話我聽『我哋交往咗20年啦。』唉！我都冇回覆佢，因為冇嘢同佢講，不過，我一生中最開心係同佢喺深圳同居嘅日子，由佢買餸煮飯照顧到我…」此刻煌哥笑住重拾美好回憶片段：「Mary好精㗎，學晒我啲廚藝後就唔畀我入廚房…但呢啲係以前嘅事。」他又興奮道：「𠵱家我要睇將來，等多2個月，明年2月中係我80歲大壽，生日願望邁向90歲。」煌哥最想同屋企人開開心心，簡單食飯慶祝。問到會否想Mary和他慶生？他帶點無奈道：「反而想多啲自己以後嘅事，又唔想係要劃清界線，我要做嘅嘢都做咗，包括喺湖南買咗樓畀佢，有時都會畀$2000-3000佢，有能力咪畀少少佢囉，但如果叫佢兩母女落嚟，就要畀$10000交通費，未計額外使費。」對於87歲患肺炎的余慕蓮(魚毛)話自己「唔襟擺」，對此煌哥不認同說：「自己判自己死刑？」他指魚毛個人都好灰：「佢喺TVB都冇好過啦，成日做垃圾婆成日畀人笑，我為人就好樂觀，𠵱家等緊大壽，回顧過去最遺憾係一個疫情冇咗工作，令我丟咗事業。」
