陳淑蘭拆解誤傳為黎明自殺舊史 親揭與被掌摑情敵莫可欣破冰細節丨獨家
發佈時間：07:00 2025-01-08 HKT
55歲陳淑蘭（蘭子）與好友周國豐和陳淽菁開設了YouTube頻道《豐陳三俠》，分享多年的所見所聞，語出驚人，除自揭曾因好色去過「鴨店」、大爆袁詠儀找過茅山師傅幫手增運外，還拆解自己「為情自殺」之謎。不過，卻有陳年舊史，傳當年她是為舊愛黎明做傻事，蘭子堅拒否認呼冤說：「豆腐我就冇得食佢喇，食呢隻死貓就食咗咁多年！」另外，她又親揭跟傳聞中掌摑過的「情敵」莫可欣破冰細節，好有娛樂性。 採訪：方騫平 攝影：林賓尼 場地：帝樂文娜公館
陳淑蘭與陳淽菁由敵人變戰友
前港姐陳淑蘭和陳淽菁因「爭仔」誤會了超過20年，冰釋前嫌後同撈同煲，由敵人變戰友。周國豐爆兩人是神婆，因為玩「靈擺」而走埋一齊。蘭子直認有算過：「靈擺話我哋可以合作到，既然應該有運行，倒不如一齊搵食啦。」3人不單止做網上節目，還會做埋PR製作公司，陳淽菁形容大家會有不同的崗位是完美合作：「國豐人脈夠，佢負責做品牌推廣及幕後；我做企業培訓。」蘭子笑住插嘴說：「我接客！或可做反面教材。」
相關新聞：陳淑蘭67歲舊愛祁文傑宣布婚訊 新娘子撞樣張曦雯註冊完即度蜜月
同撈同煲三人組
夾在兩女之間的周國豐坦言驚驚地：「其實我最驚佢哋會再反面！好彩暫時OK，可能多咗我做中間人，會令雙方冷靜啲啦，加上重拾嘅友誼會更珍惜。」蘭子即大派定心丸：「以前誤會佢(淽菁)搶仔就有拗撬啫，𠵱家利字當頭反而冇事發生，而且年紀大咗會聽道理。」大方的淽菁讚蘭子有好多優點：「其實佢幾Cute㗎，我未遇過一個人好似佢咁可愛，件事過咗幾十年仲肯認係自己唔啱。」周國豐堅持，做人要接受自己的過去，如果隱瞞過去，不開心是不會消退的，故《豐陳三俠》想搵能打開心扉講真說話的嘉賓。
相關新聞：黎明「舊愛」自爆去過鴨店！因一事火速delete 自認好色都難接受：真係嘥時間
食唔到黎明「豆腐」
問到會否力邀盛傳是蘭子「舊情人」的黎天王(黎明)？蘭子大笑說：「佢老婆(阿Wing)未必畀喎，上次約佢訪問都畀佢拒絕咗。」周國豐也「投訴」：「佢結咗婚之後都未見過。」陳淽菁就欣賞黎明「哲學論」，好想聽到他的金句。重提當日陳淑蘭自殺，據陳年舊聞，傳過蘭子當年跟黎明登台後，因展開過一段秘密情史，她為情自殺，不過，蘭子再三強調無這回事，實情是因為爸爸過身令情緒出了問題所致：她說：「如果嗰段時間任何一個男人出現都關佢事，咪前世唔收好唔得閒？嗰時我同蔣志光及胡楓都做過嘢喎。」蘭子承認都有聽過她「為情自殺」傳言，有次在內地被一位男性友人問起：「個個名都聽過(為情自殺男主角)，但就冇聽到有黎明。」在旁的淽菁加口說：「我以為係方中信。」蘭子卻搞笑回應：「我係為譚耀文(淽菁舊愛)呀！」對於黎明牽涉其中食了多年「死貓」，蘭子卻說：「咁我都食咗死貓好耐啦，呢行唔係我食佢死貓，就佢食我死貓㗎啦，『豆腐』就冇得食喇...哈...」蘭子直認愛黎明，反問：「邊個女人唔鍾意Leon呀？不過呢隻死貓食得好甘，點可以話我為偶像而自殺？好彩𠵱家有個網台節目可以還黎明一個清白。」相對傳她曾為黎天王自殺，蘭子更介意坊間傳她潦倒到要瞓街：「真係大吉利是。」周國豐認同這種無奈感：「夠傳過我有億萬家財啦。」陳淽菁更激氣：「啲假新聞離譜到傳我同譚耀文離咗婚呀。」
陳淑蘭：畀大家食下「花生」
另外，蘭子更話不介意訪問方中信及莫可欣，又突爆和傳聞中被掌摑過的「情敵」莫可欣好friend！補充道：「雖然唔係飲茶嗰啲，但大家知發生乜事，冇介懷。」她還笑住交代跟莫可欣和好細節：「有次喺首映中和兩人同場，身邊人好驚，細細聲猛問『點算好呀？』點知佢哋越講，我就越要行過去，嚇到啲人死，以為我會做啲乜！過到去我開口打招呼話『喂！莫可欣』見到佢當時都呆一呆，驚恐回應『仲乜呀？』我隨即答『冇呀！啲人想睇我哋啲嘢，咪畀人睇下囉！』佢聽完都放鬆咁笑咗出嚟。」蘭子坦言：「年青時嬲過人及發生啲誤會唔出奇，呢啲只係年輕時小插曲，𠵱家冇事，生活得好開心。」她仲還將負評轉化做正能量帶畀觀眾。
