吳若希分享另類御夫術成功調教老公 自揭曾受拖累被通緝嬲爆想離婚 丨獨家
發佈時間：07:00 2025-01-18 HKT
32歲「惡妻」吳若希(Jinny)嫁給澳門闊少何兆鴻（Alex）邁向8年，由不時吵吵鬧鬧，甚至公審老公，到𠵱家反而激讚老公肯修心養性積極工作，為頭家及子女付出金錢及心神，表現良好。Jinny自爆結婚初期曾被老公連累，搞到被警方通緝要去警署報到，嬲到爆炸的她一度萌生離婚念頭！幸而苦心經營下，終於成功調教未成熟老公，Jinny滿足地分享另類御夫術。 採訪：方騫平 攝影：譚志光
吳若希主演的TVB新劇《奔跑吧！勇敢的女人們》中，零偶包扮演已脫節職場15年的「烏搲老婆」，表情動態勁有喜感，獲讚演大癲大喪的角色做得幾好。劇中的Jinny和現實版的自己有點相似，除了都是兩子女之母外，同樣在事業高峰期隨性地結婚生子，更一度搬往外地生活。
讚老公覺醒畀80分
25歲時奉子成婚的Jinny曾隨Alex搬往澳門生活一段時間，原來想嘗試做下煮飯婆生活：「但發覺自己怕悶，性格係停不了，即使佗B期間都經常港、澳兩邊走。」所以她堅決重拾事業。現在Jinny既事業又有家庭，感恩上天給予不少好事，包括表現得越來越好的老公，令她一直都幸福：「何生其實向來唔差嘅，尤其近年越嚟越成熟，以前佢唔夠努力，但呢幾年表現積極，會校定鬧鐘起身返工，唔止係人哋老公、子女爸爸，亦係稱職老闆，表現值80分。𠵱家不論交租、水電煤、仔女供書教學、家傭、買餸等，屋企大部份開支都係佢嘅，我只係買衫褲鞋襪畀自己及負責小朋友興趣班支出。」問到是否成功調教老公？她笑說：「咁做人要有進步嘛，可能有小朋友後覺醒，希望我係幫到佢啦！」
摸到夫妻相處方式
當問到現在是否不再公審老公時？她卻有所保留：「間中啦，因為佢都有啲蠢嘢發生。」不過，Jinny就話兩公婆溝通越來越好，更摸到越來越好的相處方式：「其實每次玩公審，佢係會嬲，明白係踩着我底線，好快反省知道錯喺邊，有句話佢講得幾好㗎『同得佢結婚都知道佢係咁嘅性格啦！唔接受連婚都唔會結。』我哋兩個對婚姻睇得好重，既然兩公婆就要一齊努力keep住溝通。」結婚近8年，Jinny坦言的確有諗過離婚，還自爆最嬲的一件事：「佢係澳門人，港、澳兩地生活節奏唔同，佢好chill我好急，兩地法例都有好大差別，比如澳門交通違例罰款可以累積一年繳交，香港就月月清。佢試過喺香港揸我部車被炒牌，雖然我有提示佢快啲交罰款，但佢冇理會拖足半年多，直至有日我接獲警方來電話『吳小姐，我哋想畀封信你，因為票控罰款逾時未交，法庭落咗通緝令。』對方還補充一句『只係小事冇嘢嘅，交返罰款就得㗎喇！不過就要到警署銷案。』嘩！聽完好surprise！我咁大個人都冇乜入警署，重點我又冇做錯都係被拖累，當下真係嬲到冇嘢講，只係對住老公苦笑加句『何生好犀利呀！』」然而就「吳若希被通緝」事件，兩公婆從中學會要互諒互讓：「兩地文化差異對婚姻係會有影響嘅，我有提佢快啲交，但喺佢嘅世界及角度未必get得到。」
重視爸爸參與度高
Jinny分享另類御夫術：「我哋以前成日吵吵鬧鬧，其實只係激烈地討論件事，咁當然，早幾年無嗱嗱被通緝，間中有諗下離婚好正常，不過，離婚兩字就好少講出口，成日講就返唔到頭。我會成日搵佢呃水吹，最重要佢喺爸爸角色上參與度高，尤其我要外出工作，佢會take care小朋友生活及學習，佢嘅位置重要到唔係可有可無，絕對唔係兩公婆齊全，但好似偽單親咁，而且仲會紓解到我壓力。」
