朱敏瀚巧妙拆解跟陳曉華關係：由羽毛球轉打網球 為「了解中」急註解 丨獨家
發佈時間：07:00 2025-01-22
32歲TVB上位小生朱敏瀚(Brian)與剛奪「女飛躍」的陳曉華傳出同居及閃婚，消息震驚網民，而朱敏瀚也大方首認是「了解中」的關係。不過，時隔3個月傳來TVB棒打鴛鴦，Brian即避忌地改口，強調不想一句說話有無限演變影響到任何人，甚至跌落「打咗羽毛球未」陷阱，故便將「了解中」加入註解，解釋是長期keep住了解，keep住友誼的好好朋友，他更抵死表示：「𠵱家我轉打網球。」採訪：方騫平、攝影：朱偉彥、服裝：Sandro
朱敏瀚主演的TVB新劇《奔跑吧！勇敢的女人們》飾演隱藏型暖男，有不少「微表情」場口都能帶出喜感。面對劇中吳若希瘋狂；蕭正楠的滑稽，Brian按「天書」人間清醒提示去做，如同於瘋人院中唯一清醒，變了最不正常的人，反而好有火花。等了一年才有劇作出街，Brian坦言曾有過存疑：「最驚太耐睇唔到成果會重複犯錯，𠵱家解除疑慮肯定咗啱嘅方向。」
新劇獲讚魅力升級
至於獲網民力讚成熟不少兼魅力升級，Brian笑言可能年紀大了：「而且角色好重要，今次係演一個比較沉穩經理人，每次出現都為吳若希解決到問題，加埋形象，係個可以為自己攞到分嘅角色，最開心亦有觀眾因此開始留意我。」
跟陳曉華想法一致
Brian曾承認要再深入與陳曉華了解，不過，隨住傳聞戀情被公司打壓，Brian和陳曉華齊齊封口，Brian更表示有話要說：「其實由閃婚到同居，甚至分居都好似追劇咁，連阿媽都追問我『又有乜新劇情？』多謝大家關心我嘅生活。」Brian再多次機械式解釋：「我純粹自發性(封口)冇收到任何人壓力，我講錯嘢，落喺我身上冇問題，但影響到公司及其他人就唔好，盡量要小心低調做事，大個咗要對自己說話負責任，唔想一句說話會惹來無限發揮及發酵。」他又拆解當日所講的「了解中」用意：「每個朋友都要了解，需要相處就要了解對方…」他還拖埋記者落水：「正如做訪問都要互相了解啦，了解只係一個動詞，好朋友係個名詞…但唔知點解『了解中』會衍生好多代替字眼，帶有結伴術語，甚至再激進啲連結埋『羽毛球』論，我唔想跌落呢啲陷阱。」語畢Brian笑笑口抵死地補充說：「不過，𠵱家我轉打網球。」對於陳曉華跟他一樣表現避忌，Brian爆響口：「係呀！可能我哋思想方法都幾一致！但冇共識。」
keep住友誼的好朋友
問到現階段跟陳曉華的關係？Brian帶點尷尬形容是keep住了解，keep住友誼的好好朋友，當被追問是否轉玩地下情時，Brian尷尷尬尬地連環否認：「冇冇冇！冇話轉唔轉，所有事都冇發生過。」不過，被讚兩人好匹配時，他即偷笑說：「咁靚仔靚女啱啱又出新劇…總之我𠵱家嘅信念係做嘢為先，唔好影響其他人費事講多錯多。」Brian「耍住太極」談自己的感情生活：「我有非常濃厚的友情及親情，年前爸爸去世，多得張振朗及周嘉洛抽空參與亡父喪禮及陪伴我去歐洲散心。」
