何雁詩鄭俊弘有信心囝囝半年內行到 美國之行收獲豐 展望蛇年發展更好丨獨家
發佈時間：07:00 2025-02-01
何雁詩（Step）和鄭俊弘（Fred）去年發現2歲多囝囝鄭讚廷（Asher）患有罕見遺傳病「天使綜合症」，一度令兩夫妻在龍年感到失落，但隨着他們積極面對，加上去年底到美國出席有關講座，囝囝又在當地接受治療後進步神速，現在囝囝日日練習下有望蛇年能成功步行，而兩人又會積極工作和行善，相信蛇年會是美滿的1年。採訪：杜杜 攝影：孔子 髮型及化妝:Joanne Chan 場地:Studio Meta
Fred坦承最初因囝囝的病，龍年曾一度感到難過，但後期已好轉，「上年得知阿仔個病係好唔開心，之後我哋扚起心肝去籌款做其他嘢，畀人知道咩係天使綜合症，自己工作上，拍劇又去咗美國開演唱會，做咗個音樂劇，其實都幾忙，好充實。」 Step認為因囝囝的病，反令他們變得更加積極，「比起以前咁多年嚟講，係push自己做多咗好多嘢，龍年令我哋發掘咗自己，我做多咗體育主持工作，又搞慈善活動，我哋從來冇諗過可以做到咁多，認識咁多世界各地關於罕見病嘅人，發掘好多自己潛能。」Fred好認同，「為咗小朋友我哋乜都肯做，以前冇諗過可以舉辦演唱會，原來殺到埋身都可以做到，甚至去聯絡外國嘅團體幫助，我哋係成長咗好多。」
囝囝治療後進展佳
去年底到兩人到美國出席當地有關罕見病症的講座，收獲相當豐富，Step說：「參加醫學講座，科學家、醫生同埋藥廠畀咗好大信心我哋，知道呢個病係好有進展。」令她對未來充滿信心，「𠵱家喺我哋字典裏，係唔會再有冇可能呢樣嘢，呢個係外國啲家長教我哋，佢哋話好多人會同我哋講『No』，但係我哋要問『No but why』。」Fred補充說：「要問點解？唔可以接受只係『No』呢個答案。」囝囝在當地亦接受了3星期密集式治療，Fred說：「雖然過程係辛苦，每日要5個鐘，做物理治療教佢點行點企，好似玩阻礙賽咁。」Step說：「有跑步機畀佢慢行，老師教佢點踏步，我哋都買咗個跑步機喺屋企畀佢，等佢慢慢行，仲有個踏單車機，等佢知道隻腳可以咁樣郁。」
望幫亞洲其他病童
他們最好開心，囝囝經過這些治療後，有明顯進展，身體協調做得更好，Fred興奮說：「佢扶住可以企到起身，同埋識得爬，所以要睇住佢，唔可以就咁擺咗佢喺度自己做嘢。」 Step感動說：「除咗平地，佢仲識抬起隻腳去爬，呢啲可能對正常人嚟講好小事，但對佢嚟講係好大進步。」由於囝囝平日在家也會不斷練習，所以踏入蛇年，他們對囝囝病情進展好有信心，Fred說：「我信心係大咗，佢呢年可以踏到步。」Step信心更大，「我覺得唔使，半年都得，希望佢可以自己行到幾步。」另外他們亦會幫囝囝尋求藥物治療，Step續說：「好想畀囝囝入到藥物科研，希望佢可以快啲有藥用，佢呢個歲數係黃金階段，個腦發展係最快，希望有藥物幫助佢醫治到。（唔介意畀佢去試新藥？）睇吓咩藥先，但至少都有機會畀我哋判斷適唔適合佢。」而他們在美國期間認識了很多家庭、支援機構和藥廠，希望未來作為橋樑，幫到亞洲區其他小朋友，「佢哋都好想踏入香港，希望我哋做多啲聯絡，都希望用我哋能力幫到手。」
加國合體搞慈善騷
工作方面，兩夫妻在蛇年一樣有不少新計劃，重拾高爾夫球運動員身份的Step，將會努力參加比賽，「當然我想贏，但至少參加返先，同埋今年都想出3首歌，呢個都係目標，另外我做緊個YouTube Channel《體育部隊窩》，訪問啲運動員，都係我醉心做嘅嘢，好鍾意運動世界，好欣賞運動員嘅心態。」Fred繼《爛好人》後，已籌備緊新歌，「都係同王雙駿合作，好期待再同佢錄音，今年暫時出住1首歌先，開騷都係3月慈善騷先。」Step解釋這個在溫哥華和多倫多舉行的慈善騷她亦有份，「希望出1分力，為加拿大嘅天使綜合症總會宣傳多啲，同幫佢哋籌款。」而Fred最開心音樂劇《為你鍾情》今年會重演，「上次反應好好，今次可能會轉啲歌，好享受做，有得唱歌跳舞又演戲。」
