Gin Lee鄧小巧想到原始森林玩camping 望組「英皇旅行團」 VIVA曾傲棐恨去澳洲丨獨家

Gin Lee（李幸倪）、鄧小巧、VIVA和曾傲棐（Arvin）在龍年都發展理想，踏入蛇年他們各有不少新工作目標。除了音樂上，他們最希望能組「英皇旅行團」，寓工作於娛樂邊拍節目邊旅遊體驗生活。採訪：杜杜 攝影：譚志光 髮型: Heibie Mok@[email protected](Gin)、Don Don@Indulgence Salon(小巧)、@myos_karol(Arvin)、Ritz Lam+Jeremy Wong+Kelvin Liu+Taka Chung+Hiro Chow@myos_hair(VIVA) 化妝:Omix Leong@omix(Gin)、andy_makeup_(小巧)、Omix Leong@omix(Arvin)、Cyrus Lee Makeup Team+Irene Hung+Davina Cheung(VIVA) 服裝:@sandroparis@majepairs@aliceandolivia_hongkong(Gin)、@sandroparis @fingercroxxhk@ithk(Arvin)、@ITHK+Marimekko(VIVA) 場地:Studio Meta

VIVA龍年做了很多不同風格的歌，展望蛇年會嘗試比較統一風格，Ada（姜咏鑫）說：「咩都去嘗試，未摸得透點先至係最啱我哋，邊樣最代表我哋。」ValC（張鈊貽）就透露她們今年會出慢歌，「上年3首歌都係輕快或者快歌，想有返首歌我哋上台就咁唱畀大家聽。」她們還想繼續拍團綜，Carina（李晞彤）說：「我哋住埋一齊後，好幫到建立感情，同時間又練緊做啦啦隊，亦做緊新歌《Morning Call》宣傳，雖然好忙，但反而有更多交流空間。」ValC補充說：「好多共同經歷，維繫得更好，希望今年仲有團綜拍。」

Arvin預合作會畀VIVA恰

Arvin上年推出了2首R&B及1首慢歌，蛇年則會嘗試更多不同風格，除主唱外還會向其他方面努力，「想喺其他崗位見到自己個名，自己寫緊歌，希望有自己寫嘅作品推出，亦會學吓mixing。」去年參加了超過30場校園巡唱，亦令他體會很深，想做些講到自己心聲又令人有共鳴的歌，「簡單嘅鼓勵說話，可能只係多年前作品2句歌詞，但好多人喺唔開心攬住就可以好有力量，我好想今年做到咁樣嘅作品。」講到若VIVA跟Arvin一齊合作，未想到形式Arvin已幻想到可怕畫面，「佢哋4個實會合作恰我啦！」Macy（馬思惠）笑言已諗定欺凌方法，「我哋拍緊團綜要好辛苦咁搬篋，可以變咗曾傲棐搬晒。」他們直言最恨一齊拍旅遊節目，仲話已經準備好晒，ValC說：「練完啦啦隊後，發覺大家幾鍾意挑戰極限運動，想玩吓激流、跳傘。」Arvin興奮提議，「一於去澳洲！」ValC扮無奈話：「香港冇得玩，咁我哋唯有去澳洲玩啦！」Arvin再sale話：「塔斯曼尼亞仲有黃色極光睇。」

小巧望不再被指「違例」

小巧有不少音樂目標，希望在蛇年完成，「第1件事出隻碟先，之後就希望做騷，然後完成到自己幾首嘅創作。」原來她未推出過大碟，好想今年一嘗滋味，「都出咗好多首歌，我入公司出咗一啲，獨立時又出咗啲，都冇出過實體，可以集結出大碟，計返係第1次出大碟，之前都係出EP。」她直言沒有雄心壯志在大場搞演唱會，認為在細場更容易表達訊息，「細規模同我想表達嘅嘢比較接近，寧願喺400、500人嘅場做多幾場。」個人方面，她笑言不想再被指「違例」，「網民成日話我個名叫小巧，但係違反商品說明條例。」她早前貼出中六時照片，網上也有聲音，「有人話係當小巧仲未違反商品說明條例，哈哈！其實我老公一路都好健康，好注重飲食，係我好為食啫！」35歲的她坦承新陳代謝慢易令脂肪積聚外，還自爆身體出狀況，「身體上的確有毛病出現過，所以我只係朝住健康方向，對身形係冇乜壓力。」

Gin學識注重身心靈健康

兩大樂壇頒獎禮都奪得金獎的Gin，今年計劃先出大碟，「已籌備緊啲後期，要揀相同裏面啲內容係點，喺最適合時間就會推出。」之後亦打算開演唱會，「講咗好耐，亦都儲咗一定嘅歌曲，最理想今年年尾，出咗碟再出多幾首歌就開騷。」去年到台灣上身心靈課程後，她坦言比以往更懂享受生活，「今年我想玩多啲，呢2年調整咗自己嘅心態，有時唔使太過刻苦，努力做嘢，但係輕鬆姿態。」她認為身心健康，反而對創作及做表演藝術更有利，「我哋都係輸送好多能量嘅工作，能量要好，接收嘅人先會接收到好嘅能量，呢個係我嘅責任，要搞好自己狀態。」音樂以外，Gin和小巧最想拍旅遊節目，小巧就提議去些原始接近大自然的地方，「我哋生活都已經好舒適，喺我哋生活入面都有好多便利，有時去感受呢個世界，可能去過自己生活模式好唔同嘅生活。」Gin亦好贊成，「森林裏面camping嗰啲。」小巧興奮話，「英皇旅行團，名都已經諗好！」Gin和議，「講多啲就有啦！」