姚焯菲望演技提升拍《愛·回家》識玩爆肚 蛇年鍾柔美努力學寫歌 詹天文試獨居生活丨獨家
發佈時間：07:00 2025-02-07 HKT
姚焯菲（Chantel）、鍾柔美（Yumi）和詹天文（Windy）龍年過得好充實，除工作外，還要努力考好成績入大學。展望蛇年，她們都想工作和生活上有新嘗試，在廣州升讀大學的 Windy，會嘗試過獨居生活；Yumi 除會多唱慢歌，還會努力嘗試作曲和填詞；未入讀大學的 Chantel會全情投入演藝工作，剛加入《愛·回家之開心速遞》希望盡快提升演技，拍攝時可大玩爆肚。採訪：杜杜 攝影：朱偉彥 髮型:Hugo Poon@PRIVATE i salon化妝:King yip@kingsmakeup
Windy坦承龍年為考公開試放慢了工作腳步，所以未算過得太滿意，「魚與熊掌不可兼得，喺學業達到好滿意嘅成績，入到想入嘅大學，但事業方面做嘅嘢未夠多，淨係出咗1首派台單曲同劇集歌。」但去年願望，踏入18歲植髮卻順利完成，「DSE完咗第2日就去做咗，係咪睇唔出？！髮際線天生高都困擾咗好耐，1年恢復期到今年5月就完成，到時可以再染同整其他髮型嘞！」她直言現在自信返晒嚟，「以前吹風成日要撳住啲頭髮，𠵱家可以吹啦！哈哈！」
Windy望操到馬甲線
新1年願望，Windy想苦練馬甲線，令着衫更多選擇，「𠵱家只係喺瑜珈墊做簡單訓練，想去健身做啲機器式鍛煉。」她又想勤練樂器，向唱作歌手路邁進，「希望不久將來曲詞編監都參與到，大學揀咗啲關於編曲嘅堂，希望音樂嘅範疇有深啲造詣。」她透露將出新歌嘗試凶靈風格，「希望自己喺唱歌方面有多啲進步同突破。」《青春本我》後，她未有拍劇機會，都想多嘗試，「都知好辛苦，但如果出嚟效果觀眾鍾意，會好有滿足感，想演啲雙重人格或者反差大嘅角色。」已入讀廣州星海音樂學院流行音樂系的她，有望在廣州過獨居生活，「本身係住6人宿舍，但大家生活習慣有啲唔同，下學期會搬去附近一個人住。」
Yumi演高海寧年青版
龍年推出了3首歌，Yumi都覺得好滿意，「2首快歌外，仲出咗首劇集嘅歌《Come with me》，全英文係新嘗試，見大家反應都唔錯，好proud of《企業強人》仲攞咗最佳劇集。」她認為學業方面仍有進步空間，「未入到理想嘅大學，會喺未來時間爬返上嚟。」而她最開心已正式報名考車牌，「生日後冇耐即刻去報咗，未拎到真正嘅身份證，攞住張紙就去報。」她好羡慕Chantel感受過自駕遊的樂趣，期待正式學車，「我見Chantel post出嚟，好想坐佢架車呀！」
Yumi希望蛇年能做多些新嘗試，「我畀大家印象係跳唱歌手，唔想大家悶，想試吓唱啲抒情歌，雖然唔係我嘅強項。」她亦會努力嘗試創作，上年已踏出了第1步，「1個人喺間房度對住個琴，咩都唱吓，冇乜框框咁掉晒所有嘢出嚟，好開心行到呢步開始作曲填詞，最難就係第1步，𠵱家仲慢慢摸索緊。」演戲方面，她繼《特勤女團》後再完成《夫妻的博弈》，更有幸演高海寧年青版，「好開心導演搵我，覺得我同高Ling有啲相似，希望可以繼續嘗試。」跳舞風格，她亦會有所轉變，「之前跳舞比較韓式，都想試吓跳比較歐美風，可能比較成熟啲，𠵱家不斷學習緊。」
Chantel將首演音樂劇
Chantel好滿意龍年發展，因達成不少願望，兼顧學業下仍有不少作品，「上年真係讀書為先，希望冇跌好多人氣或者樂壇成績。」對於以「Academic High Distinction」榮譽在奧克蘭拔萃女子學校畢業，她感到很榮幸，「頒獎係個肯定，都努力咗好耐，有個學業嘅獎都好欣慰。」憑《愛·回家》主題曲《這個家》奪得「最受歡迎電視歌曲獎」，她亦好感恩，「真係唔容易攞到《萬千星輝》嘅獎，我見好多大前輩攞呢個頒獎典禮嘅獎，自己攞好唔真實，要多謝大家欣賞同喜歡呢首歌。」
踏入蛇年，Chantel已有好開始，參與處境劇《愛·回家》演熊家表妹「高一彤」，正努力適應，「演戲唔係我最拿手嘅嘢，需要再磨練，學習身邊嘅演員點做，處境劇同其他長劇唔一樣，前輩都有提點我。」她拍此劇更有目標想做到，「好期待熟練後可以爆肚，佢哋爆得好幽默，唔會太過over切合個角色，自己都想試吓。」今年她還會首次演出音樂劇，「到時再同大家講細節，要唱歌又要演都好期待，而嚟緊出新歌係大突破，大家要留意。」
