姜皓文殷寧期望觀眾爽手畀「人情」 拍《哈哈哈》賀結婚25周年似足搞婚禮丨獨家
發佈時間：07:00 2025-02-08 HKT
姜皓文（黑哥）和太太殷寧繼90年代合作拍劇集後，最近夫妻檔再合作拍賀歲片《哈哈哈新年喜戲》，不過黑哥主力幕前演出，殷寧則負責監製和編劇。而該片劇本其實是殷寧送給黑哥慶祝結婚25周年禮物，黑哥決定搵投資者拍成電影圓心願，兩人直言整個製作過程似足搞個婚禮，最期望觀眾如賓客爽手畀「人情」！採訪：杜杜 攝影：林賓尼 髮型:Jove Shek 化妝:Manman Fong 服裝:DEGAIA HK 場地:Le Monde Resturant
黑哥一直想構思和製作部電影，殷寧爆他由去年開始心郁郁拍賀歲片，「你一路都話想拍賀歲片，拍返啲開心嘅嘢，我有記喺心度。」剛巧去年馬來西亞搞院線的朋友着黑哥不如拍部賀歲片，正好他手頭上有個故事題材，「我哋結婚25周年紀念，老婆寫個劇本畀我做禮物，如果唔拍出嚟，冇乜意思喎！」殷寧認為將劇本拍成電影，對他們確有特別意義，但不會強求，「開呢套戲時都諗開唔開好呢？！老公話『最終冇拍好似嘥咗你個劇本喎』，我唔緊要㗎，我寫嚟係為開心，最緊要件事係咪好？！係咪得？！係咪做得開心？！」
慘遇投資者甩底
黑哥坦承搵投資者是這次製作遇到最大難題，「有時搵到投資者，都未必真係投資。」殷寧解釋：「會畀人甩底，一開始我哋係樂觀，一講就OK，但有啲人唔係我哋預算咁樣。」黑哥都好諒解情況，「都明白嘅，𠵱家個氣氛同時勢又唔係咁好。」殷寧更因堅持等資金到位，令電影延至去年11月才在馬來西亞開鏡，「有啲人話我係好蠢嘅堅持，但係我對人哋嘅承諾，我冇錢點出糧啫！一定要收齊錢先知我哋落去點做，同埋得咁短時間，又冇可能仲分幾期出糧，呢個過程係比較辛苦。」距離賀歲時間迫近，殷寧擔心趕不到進度，單是剪接已令她好頭痛，「我哋又唔係得一個版本，仲有馬來西亞、大陸版本要剪，要喺咁急嘅時間裏面做晒咁多版本。」
電影製作名單中，監製名為「姜氏美人」，原來是黑哥專登為太太改，因他最初是親自包辦監製，但太太心痛他才主動請纓，「呢個本嚟係我做，𠵱家我都有份做，只係老婆睇唔過眼我又要演，就同我講『老公你做好啲戲就得，有咩就交畀我』，最初諗住交啲小事畀佢，點知越嚟越沉重，佢擔當個責任就越嚟越大，我都唔知點樣幫到佢，我再插手驚會混亂，佢就咁孭晒飛做。」曾是演員，又身兼編劇的殷寧好明白黑哥一人分飾兩角難度，「我喺現場見到佢，呢頭做呢個角色，轉頭又要再做嗰個角色，同一個場景要設計兩個角色，呢個過程都真係會好攰囉！顧唔到咪仲弊，不如專心做好演員嗰瓣。」
憶童年住兒童院
講到寫劇本送老公，殷寧當初出發點好單純，「我一開始冇諗咁多，淨係好玩、挑戰，冇諗過後面有咁多嘢要兼顧，諗住行就行啦！行落先知原來咁嘅，死嘞！要硬住個頭皮做好件事。」而戲中兒童院背景，原來是黑哥小時候的親身經歷，「係我住兒童院嗰時嘅陰謀論嚟，嗰時小朋友好多胡思亂想，畀社會福利署安排住兒童院個心係比較驚慌同無助，好多奇怪嘅嘢會諗出嚟，呢間兒童院會唔會好奇怪？！我做錯事會唔會對我點？！社監咁奇怪嘅半夜喺度出出入入，其實我哋宿舍有層係社監嘅房，佢兩公婆會住喺度夜晚會放狗啫！𡃁仔又會喺度亂諗，覺得好唔安全，會唔會賣咗啲細路呢？！呢度佢話晒事好似國王咁。」
演員出身的殷寧，最初也打算粉墨登場客串一角，「曾經都有諗過，但係計落其實我唔會有時間，又要聽住佢哋講對白，做呢樣嗰樣，我連個編劇都推埋出去拍，我仲邊有時間呢？！係唔會有時間去客串到，同埋都搵唔到個位我可以攝得到落去，有諗過有冇個角色輕巧啲，但見我唔到又冇用啦！」兩夫妻坦承這次合作可一不可再，除了搞到嗌晒交，整個過程似足搞場大型婚禮艱難，殷寧說：「我哋一齊着晒紅衫好似結婚咁，籌備好似搵咗個wedding planner咁，又要搵場地，又要搵攝影師，又去影相、整回禮，又要請大家嚟。」黑哥笑指：「表演嘉賓又係自己啦！」殷寧續說：「做騷時歌都唱埋，但係我哋如果結婚都係請一千幾百人啫！但係今次係要請千千萬萬嘅人，心情好激動同緊張，希望大家一定要嚟捧場，畀人情呀！」
