周吉佩無懼夾擊強攻住家男市場 「喊包兄弟」顏志恒魏嘉信成秘密武器丨獨家
發佈時間：07:00 2025-02-10 HKT
TVB皇牌節目《中年好聲音》系列，帶挈「中一生」於過去一年都勁旺，變身《中聲》ICON的周吉佩(吉吉)更吸金過百萬，豬籠入水。眼見最近《中聲3》從後趕上，吉吉自揭今年也會出招，搵埋「喊包3兄弟」顏志恒、魏嘉信做秘密武器來增加實力，強攻住家男市場。採訪：方騫平 攝影：譚志光 場地：九十番地居酒屋
日前周吉佩率「中一生」戰友劉智衛、支嚳儀(支支)、羅啟豪、李佳、顏志恒、林鉫徫、涂家堯、丁文俊、魏嘉信拜年，齊齊「撈起」。去年順風順水發展得不錯的吉吉，坦言過去一年太忙，時間管理得差，尤其維繫朋友方面做得不足，有待改善。除此之外照顧身體方面都不夠好，兩次病到失聲；李佳同樣嫌自己不識得注重健康：「教唱歌搞到食無定時變暴肥，影響到腸胃，喉嚨又易唔舒服，但唔想學生失望，唔好意思再請病假，反而唔係錢嘅問題。」
啟豪嫌唔靚要醫美
羅啟豪最開心去年推出人生第一首單曲《相信相信》，新歌《還未分享的歌單》快將發佈，他又搞笑地嫌自己上年不夠靚仔：「今年要求靚仔多啲，唔排除考慮做醫美。」問到是否要同吉吉拗手瓜？啟豪即投降認輸：「一定唔夠佢鬥，高度方面都唔得喇，佢太靚喇。不過，我都唔係賣樣嘅，所以唔會有壓力，主力做下運動Keep返Fit。」啟豪獲顏志恒附和，顏志恒表示也想學似吉吉般有聲有樣，也支持做醫美！林鉫徫希望可以減肥及學舞；涂家堯想增高。
啟豪去年成功搞咗個大型聖誕市集。去年底吉吉舉行處男個唱《第三人生演唱會》。
支支有是非唔認紅
支支最開心又有機會「跳」入電視拍到《愛．回家之開心速遞》客串演「支珠絲」。對於去年受是非纏身的支支耍手擰頭否認是人紅是非多：「自己唔係紅，我相信有人嘅地方就有是非，因為控制唔到人哋嘅思想，與其控制唔到人哋就做返好自己。」好有heart的支支用心經營social media，經常夜間剪片，搞到近視加深了200度。至於劉智衛忙做幕後同時，望多返點時間接觸大自然；丁文俊、魏嘉信去年於《一班好聲音十力無限演唱會》中突破自己操肌，曾晒肌的丁文俊說：「可惜好快無腹肌！故今年要長期作戰。」正職是律師的魏嘉信卻要挑戰做綜藝，自言可以去到好盡：「其實我可以舔地轉圈乜都得，最重要可以拋個身出嚟做！」
成《中聲》標記添壓力
另外，作為《中聲》ICON的周吉佩坦言會有壓力：「每次都當最後一次演出，不容有失，最怕發台瘟。」面對《中聲2》及《中聲3》左右夾擊，吉吉認為每人有獨特風格不能比較，反而要學習對方的長處。雖然吉吉定過抬油，但自揭今年也會出招，行單之餘會做多少少：「我同顏志恒、魏嘉信封為『喊包3兄弟』，因為當日嘉信被foul時我哋攬住喊。」他又指3位人父有共同話題：「除咗唱歌以外會交流湊仔經，今年我哋應該會合作做啲音樂作品，發放正能量叫人唔好喊。」
