七師傅勸呂爵安學姜濤保住處子身避緋聞 逆市下醒你簡易催運風水陣 丨獨家
發佈時間：07:00 2025-02-18 HKT
爆紅的玄學家七師傅(七仙羽)神預測股市、樓市、傳染疾病、特朗普選為美國總統、甚至提過今年犯太歲忌用的名字…走入蛇年，七師傅再發功教大家趨吉避凶貼士，預言今年會爆出更多不倫戀情，故傳授淡淡定對抗「小三」方法。講到圈中紅人，七師傅指盧瀚霆積落福報不怕犯太歲，還支持姜濤做肥仔，不過，卻反對呂爵安和林明禎鬧緋聞，叮囑他要學姜濤做處男，好言相勸：「童子尿都值錢啲喇！」 採訪：方騫平
七師傅金句是「師傅愛你」，眼見現在經濟不好，她每日在佛堂幫港人修煉遍地黃金法，希望各行各業生意好，人人有工開，財源廣進。她提示，蛇年火重，空難爆炸、車禍起火、美國山火等都跟火有關，所以提醒大家小心爐火，而火旺令身體容易失衡，要注意「3高」及腸胃問題；今年名字犯太歲的有4個字根，忌叫豬仔、豬女、阿虎、阿蛇，即使似蛇形的S字都不好。
大門廚房乾淨企理
七師傅醒大家簡易風水陣，人人都做得到：「想招財就要留意返門口、廚房、廁所要乾淨企理，大門等於一個人把口，食啲乾淨嘅嘢就少啲腸胃病，門口放地毯，玄關唔好亂，咁樣人都健康啲，家運都好啲；而廚房代表住女主人財運，唔好亂七八糟，唔好隔過夜，馬上清理用過嘅洗碗筷及垃圾；洗手間要保持乾爽；藥物收埋入櫃唔好放喺當眼地方，否則就有提示食藥作用；仲要放啲金磚擺設、聚寶盆、支票、招財貓、揮春催旺偏財南位及正財西南位，買六合彩都會較容易中獎，有埋可以撲火嘅孔雀及消災解難大鵬鳥就更好。」
不費力氣擊退「小三」
她表示，2025年逆市下做生意難賺錢，經濟不好，股市、樓市都影響，做財經記者出身的七師傅分析說：「香港樓價要等多20年後才反彈，預計未來港島區樓市呎價暴跌至10000蚊以下；九龍區低於7000元，重災區豪宅更加唔好掂，買咗嚟自住嘅負資產業主就要保住份工。」故師傅叫結婚置業人士就要想清楚，更說出重點：「我見過好多對夫妻未供完樓就離婚，𠵱家安取唔等於樂業。」至於股票都咪搞：「就算好多擅於炒股嘅上市公司主席都係輸收尾，單睇業績圖表係冇意思嘅…總之唔炒就唔會輸，至少將辛苦錢穩穩陣陣去下旅行好過。」但，七師傅提醍，香港人熱門旅遊地點，日、韓位於東北位犯「五黃」，有災難、意外及病毒問題：「尤其4月後更多麻煩事，要去嘅話最好帶埋平安符，但都係盡量唔好去啲磁場唔好嘅地方。」至於蛇代表誘惑想食禁果，衍生好多不倫戀，七師傅笑住要睇實身邊嗰個：「如果老公突然準時交人一定有係心虛，會有不可告人嘅秘密…假使婚姻真係介入咗『最強小三』，作為老婆嘅不獨要容忍『小三』，仲要對老公好啲放佢出去，因為『小三』都會變老，男人有得『小三』自然會有『小四』及『小五』，呢個只係時間問題，咁咪不動聲色由佢哋互鬥，到時老公一定嫌堆女人好煩，自然返去元配身邊，唔會再搞女人，呢個係孫子兵法。」
盧瀚霆上世福報大
最後講到娛圈事，工作多到冇停手的七師傅坦言她和「下世老公」張敬軒都繼續有運行，可以合體拍廣告，仲話若果budget唔多，啲廣告費畀晒軒公。她指今年犯太歲的盧瀚霆(AL)上世福報大，犯太歲都頂得住；而姜濤身形不會影響運程，還搞笑力撐：「肥瘦呢啲係角度問題，唔係佢嘅問題，比如喺太空影落嚟咪好瘦，唔好影大特寫咪冇包包面囉，年青人發育時間想食乜就食乜！」七師傅反而對呂爵安(Edan)和「大馬女神」林明禎傳緋聞有意見：「𠵱家事業衝刺期唔好搞戀情，搞男女關係會影響形象，要學習姜濤保持處子之身，童子尿都值錢啲，可以用嚟洗面及煮蛋啦。」師傅堅持：「50歲嘅男人確立江湖地位後，60歲可以拍拖，到時人老珠要肯埋身嘅，一定就係真愛。」
