三命｜陳國邦經歷角色多重身分勁燒腦 陳佩思喊到無眼淚求導演收貨 張錦程微調妝容嗌煩｜獨家
發佈時間：22:45 2025-04-08 HKT
由銀河映像與MakerVille聯合製作的劇集《三命》，由杜琪峯、游乃海及朱淑儀監製，故事横跨六十年，關於人物角色駱澤信展開三段人生的故事，人生道路上亦有所不同，當中分別會從事公務員、漫畫家及黑幫人士。年青版駱澤信由蘇家樂擔演，中年版則由好戲之人陳國邦演出，飾演其父母是張錦程與陳佩思，今次以實力派陣容，可見戲味十足。文︰鄺芷瑩；攝：林賓尼
陳國邦︰「如果」通常係美好
陳國邦表示在劇中演繹駱澤信一角，由30多歲演到人生終結，要留意角色銜接的時間點。他說︰「我由第一集劇本開始會睇到尾，做晒分析，亦會將三個不同嘅生命組合擺晒出來，方便自己檢閱，喺演繹上會較為手到拿來。我要銜接蘇家樂所演嘅年齡層（21歲至33歲），佢嘅片係要睇，會睇吓佢特別有情緒衝擊嘅時候係點，每處理一件事時，就會展現嗰個人嘅人生觀、價值觀同態度各方面，我會專會睇一啲駱澤信稍為年青時有情緒衝擊嘅片段，從而掌握呢個過渡位點樣做到順暢。」談到角色三段人生故事，陳國邦坦言人生中有好多「如果」，人生遇到不如意的時候，只靠想像推敲答案，通常也是美好的。他說︰「喺現實入面嘅『如果』，只係想像，呢齣劇畀到我好特別機會，就係我能夠經歷呢個『如果』︰例如劇中發生一宗建築工程事件，兩個角色畀ICAC調查，同樣是駱澤信，一個身分是公務員，另一身分是黑社會，兩個分份經歷同一件事，心情截然不同。我經歷緊同一個人嘅唔同身分，對同一件事有唔同心態，對演員本身係死好多細胞，對同觀眾喛講係燒腦。」對於劇中與周秀娜有段激情戲，陳國邦笑言毋須跟太太羅敏莊申報，因為也是演員自會明白，問到場戲點激法？他大賣關子表示：「自己睇啦！」
陳佩思一場戲喊足18次
演媽媽角色的陳佩思，笑言為了一場喊戲喊足18次，喊到沒有眼淚時，哀求導演「不如收貨」。她說︰「導演想再好啲，想我見到個仔時嗰一下未喊住，唔可以有情緒醞釀，攬嗰一下眼淚先滴出嚟！咁樣嘅次序，睇劇本時唔知，演嘅時候就係要咁。」陳佩思坦言並非首次演媽媽角色，今次則是一名苦媽媽，就算見到老公張錦程出軌，當無事發生，仲會維護老公尊嚴，而不會選擇離開。談到若然現實中遇上劇中張錦程這種男人，她笑說︰「應該唔會揀佢囉！哈哈！」
張錦程拍《三命》嫌麻煩
張錦程稱拍這齣劇「好煩」，原來是指角色在不同年紀上，化妝、髮型上都有改變，「啲鬚係長定係短？一改，髮型就要跟住改，煩過啲女！」陳佩思由少女演到老年，試妝時試過畫上皺紋，但效果太過《歡樂今宵》而作罷，決定由形態演繹入手，她笑言面對兩位前輩張錦程和陳國邦，沒有壓力，反而收獲很多，大爆「老公」張錦程，不時跟她研究角色，作演繹上的調整，試過約埋蘇家樂出來一齊分析劇本；張錦程則表示︰「始終咁緊密嘅關係，熟啲會有啲好處。」
