楊協成鯨飲維他奶｜曾智華
發佈時間：14:08 2024-11-05
股市變幻莫測，但萬變不離其宗的是你有冇「真正實力」？具真正實力的股票，永遠有大富豪在觀察，等候機會出招鯨吞。當然大富豪個個身經百戰，數口精明，絕不會胡亂出招，更重要的是全部英雄感極重，若能在「不合理」的低價吞下一隻「金雞股」，肯定威爆同儕，當然這類契機幾年未必有一次。
早前當人人談香港股市急升，全盤關注藍籌權重股之際，突然有富豪靜靜起革命。邊個？正是新加坡最富有的黃廷方家族，透過旗下的楊協成集團出招，掃入維他奶國際（345）。
猛龍過江精密部署
唔係猛龍唔過江，黃氏家族這番出擊，當然有精密部署。人人以為維他奶歷史悠久，出世近80年。但原來楊協成更勁，乃125年前創立，當大家以為維他奶旗下品種眾多，銷售網勁時，睇一睇楊協成，後者更真真正正是全球飲品巨無霸，如此份量大集團突然出手掃維他奶，肯定是趁佢「謝」。
維他奶自從幾年前的「政治事件」後元氣大傷，加上管理層老化，過去3年舉步維艱，根本未見有翻身之力，故此今年股價曾跌至4.47元低位，但此股曾於2019年創出42元的歷史新高！
維他奶不是爛船，當然不止三斤釘，兼且有非常穩固的國際銷售網絡及製作基礎，較欠缺的是再開拓的活力及創意。
楊協成剛相反，1990年代黃廷方家族將其收歸旗下後，業績繼續膨脹，這次有如當年本來公仔麵是即食麵招牌，但朝氣勃勃的出前一丁迎頭趕上，於是後者將前者高價買下，統一即食麵行業成為最大王國。
低位回升有排未停
如今全球最大的華人紙包飲品市場兩分天下，楊協成在東南亞贏晒，維他奶則在海內外執豆奶牛耳。
隨着人人強調健康，強調營養的豆奶終會漸漸取代汽水市場。相信楊協成正是看準這大趨勢，決心吞併維他奶，利用兩大集團的協同效應，稱霸全球非汽水飲品市場。
維他奶股價已由低位回升接近1倍，停未？小弟幾肯定，有排都未停！
資深傳媒人 曾智華
相關文章：
負資產金額破沙士紀錄 惟影響不如當年惡劣 多得政府過去多年政策｜李聲揚
趁市旺執倉 清貨換馬6大原則 「一定要有決心 見到唔掂就要清倉」｜林本利
