汪明荃被陳志雲質疑阻後生上位愕然半秒霸氣反駁：你估而家啲港姐呀，18歲就做！

更新時間：20:50 2024-10-07
發佈時間：20:50 2024-10-07

TVB鎮台之寶汪明荃現年已77歲，仍為粵劇界出心出力，間中為TVB大騷坐陣做司儀，近日更宣布將於11月舉行紅館演唱會，對演藝事業的熱誠令人佩服。最近汪明荃忙於為演唱會宣傳，日前作客陳志雲YouTube頻道直播受訪，期間陳志雲提到汪明荃到中年時還在《京華春夢》演少女，質疑她阻年輕人上位，令汪明荃閃現愕然表情。

相關閱讀：羅家英公開順德特色建築風格祖屋陳年照網民錯重點留意汪明荃年輕時打扮

汪明荃被問及退休霸氣回應？

汪明荃日前接受陳志雲YouTube頻道的直播節目訪問，陳志雲問及汪明荃有否考慮退休，汪明荃表示：「老實講都唔係話冇嘅！有時攰得滯，啲工作重複太多會覺得悶，咁都會想停一陣，但停一陣好喇，唔會諗住停晒囉！」汪明荃續指：「我學咗咁多嘢，我如果唔做咪嘥晒！做咩嘥咁多時間去學啫？而且我想證明每一個年齡都可以做啲唔同嘅嘢。」

汪明荃：我冇阻住到佢哋喎！

陳志雲這時讀出網民留言：「呢度（留言區）都有人話『哎呀，好心畀啲後生嘅做啦』。」汪明荃即反駁：「我冇阻住到佢哋喎！後生嘅又做唔到老㗎（長輩的工作）。」不過陳志雲舉女星黃曼梨作例子：「黃曼梨好後生就做阿婆。」汪明荃指：「係因為佢自己個樣生得老積穩重呀嘛！有啲（演老人）假到死，我會阻住邊個啫？唔會㗎！老嗰啲同我一齊老㗎啦！」

汪明荃被質疑「阻人上位」？

陳志雲問及汪明荃出演1980年劇集《京華春夢》時幾歲，汪明荃表示：「我諗都係40幾歲啦！（實為33歲）」陳志雲笑指：「你咪阻住囉！40幾歲做10幾歲！」汪明荃露出了半秒愕然表情，接着她表示：「咁40幾歲先啱啱學識做戲咋喎，你估而家真係港姐呀？18歲就做。」陳志雲都認同汪明荃說法，認為的確需要一些經歷才有助演戲，更指欣賞汪明荃指「你估而家真係港姐呀？18歲就做」。汪明荃表示現時太多年輕人入行經驗不足，「唔係咩？而家（入行）即刻叫佢哋做戲、做主持，你乜嘢都未學。」汪明荃認為經驗需時間累積，獲很多網民認同。