晨光追擊│「魅影戈飛」健步如飛

大部份戰駒已做試跑，今朝出跳的參戰馬僅得十匹，場面偏向冷清，故此講番周四出跳馬畀大家參考，報導如下。

「魅影戈飛」戴頭罩由助手拍「有鴻利」跳兩段，一直豎尾，但健步如飛出腳凶狠，身靚毛色悅目。「威力非凡」戴頭罩由潘明輝跳兩段，馬身剛收好，落腳亦重一點，上力一般。

「英駿飛駒」戴頭罩由助手跳兩段，走勢硬朗有力，身靚好精壯，神態昂揚勇況依然。「志滿同行」艾兆禮跳一段，戴頭罩及鼻箍，外觀討好身壯色潤，翻步急密有力，狀態不斷冒升。

「八里旺」戴眼罩及頭罩由助手跳兩段，翻步重欠動力，馬身圓潤，走勢平淡進度徘徊。「奇異歡星」戴眼罩及頭罩由助手跳兩段，口勁偏重，且步姿生硬，出腳唔太順，進度未得。

「佳登」戴頭罩由助手跳兩段，姿態算輕鬆，馬身亦收得壯，不過力水一般，初起未夠。「首駿」戴頭罩由助手跳兩段，馬身剛收好，條件欠突出，落腳亦重一點，欠缺好感。

球星更進一步

「球星」戴頭罩由艾道拿跳三段，大步順走從容不迫，馬身壯健，毛色亮麗悅目，勝後更進一步。「包裝旋風」戴頭罩由助手跳兩段，細馬身脹卜卜，但跳來勁度普通，比起弗時差好遠。

周四出跳馬方面。「天將龍駒」戴頭罩由巫顯東跳兩段，表現活躍要緊韁抽住，馬身脹卜卜吸引到痹。「笑傲江湖」戴頭罩由助手跳兩段，神態活躍步挺硬淨，馬身更實淨毛色潤澤。

「安可」助手拍「無限美麗」跳兩段，「安可」按住落後一個馬位，出腳整齊俐落，力度比前更充沛。「快樂高球」戴頭罩由布文跳兩段，聚精會神完全唔懶，身色皆靚弗到漏油。「祝願」戴眼罩及頭罩由霍宏聲跳兩段，身粗壯唔似細粒仔，火力充裕極具氣勢。

兆文