殘奧「雙金」何宛淇疑遭歧視 涉事食肆致歉否認歧視 經理還原事件始末：「無話直接拒絕佢入嚟！」｜Juicy叮
發佈時間：14:37 2024-11-06
殘奧「雙金」得主何宛淇指，銅鑼灣一間泰式食肆涉嫌歧視，指「餐廳冇位俾輪椅」，拒絕招待她，涉事餐廳負責人及經理接受《星島頭條》訪問，就此事件致歉，承認處理上有不足，但強調並無歧視，餐廳一直有招待輪椅人士，現正循多途徑接觸何宛淇，向她解釋，「歡迎佢再嚟（光顧）。」
何宛淇今日（6日）傍晚再度發帖，表示已接受餐廳負責人電話道歉，平機會則表示，非常關注事件。以下為涉事食肆就事件回應的要點：
涉事食肆回應要點！殘奧「雙金」何宛淇疑遭歧視 經理還原事件始末：↓↓↓↓
涉事餐廳「Ayutthaya」（泰國大城船麵）陳經理表示，他當日有在場，「我喺嗰個（招待何小姐的）員工後面，我執緊枱，都聽到少少。」
「唔係話完全係拒絶佢」
陳經理講述當時情況，他說：「佢（餐廳職員）都唔係話直接同佢（何小姐）講拒絶佢入嚟。」
「佢（餐廳職員）只不過冇問到佢（何小姐），會唔會方便可以落一落嚟，坐近門口少少嘅位。」
他表示，餐廳職員希望可以幫她「摺一摺個輪椅」，「擺啲顯眼嘅地方，或者我哋望到嘅地方，就唔係話即係完全係拒絶佢，唔畀佢入嚟。」
何宛淇版本！殘奧「雙金」何宛淇疑遭銅鑼灣食肆歧視拒招待 侍應一理由拒輪椅客：↓↓↓↓
接待何宛淇職員「有少少急促」
他強調，絶無「見到啲輪椅就唔入得唔入得」，他指，餐廳一直有招待輪椅人士，周六及周日都有不少老人家坐輪椅光顧，「依家都有輪椅人士喺餐廳。」
陳經理表示，當時負責招待何小姐的一名收銀同事，「呢個收銀姐姐嘅性格，都比較有少少急促，即系有少少急節奏啲，同埋佢又唔系負責入開枱，可能就唔係好清楚流程」，因此出現今次與何小姐溝通上的誤會。
他表示，當他執完枱後，「一行出嚟望到佢（何小姐），我就見到佢已經拎住部手機影緊我哋喇。」「行出去佢（何小姐）已經畀人推走咗。」
相關熱話：殘奧「雙金」得主何宛淇疑遭銅鑼灣食肆歧視拒招待 侍應一理由拒輪椅客 何：「唔怪越來越少人喺香港消費！」
何宛淇巴黎殘奧奪金「封后過程+人生經歷」全面睇↓↓↓↓
餐廳負責人：處理不足 深感致歉
該餐廳負責人吳嘉雄接受《星島頭條》訪問對事件深感致歉，他強調並無歧視，餐廳一直有接待輪椅人士，他認為事件處理上有不足，溝通有不足，解釋有不足。
他表示，何小姐使用的是電動輪椅，而餐廳過去都是處理可摺疊的輪椅，「我哋應該畀佢嘗試入嚟，可以入嚟試......我哋應該嘗試，唔應該有assumption（假定）。」他強調是餐廳處理上有不足，會全面檢討處理輪椅人士的流程。
至於會否處分相關員工，吳先生表示：「如果要責罰，應該責罰餐廳，我哋training（培訓）做得唔夠好。」
正接觸何宛淇解釋 「歡迎佢再嚟」
他強調，餐廳一直有接待輪椅人士，絶無歧視，從來也沒有拒絕輪椅人士光顧，「依家都有輪椅人士喺餐廳到食緊嘢。」由於餐廳空間有限，職員會考慮輪椅人士就坐位置的安全性，他指今次是解釋及溝通不足。
他現正循多途徑接觸何宛淇，包括在何的社交平台留言，希望盡快聯絡她，向她解釋誤會，及強調該餐廳絶無歧視，他說該餐廳歡迎任何人士光顧，「歡迎佢再嚟（光顧）。」
相關熱話：殘奧「雙金」得主何宛淇疑遭銅鑼灣食肆歧視拒招待 侍應一理由拒輪椅客 何：「唔怪越來越少人喺香港消費！」
何宛淇：已接受餐廳負責人致歉 冀關注無障礙設施
何宛淇今日（6日）傍晚再度在社交平台Threads發帖，表示已「接受餐廳負責人電話致歉」，「希望今次唔係咁開心嘅食飯經歷，可以喚醒唔同持份者關注無障礙設施。」
她說：「唔希望因為今次係何宛淇嘅經歷大家特別關注，希望大家日後關注社會上唔同弱勢社群嘅需要，多謝大家！」
以下是她帖文全文：「無諗過一個食飯經歷帶嚟咁大迴響，亦接受餐廳負責人電話致歉，我由幾年前已經開設YouTube Channel，同埋「揸住輪椅·食勻香港」分享無障礙餐廳，希望有需要人士多一個渠道知道餐廳資訊，從而勇於踏出自己屋企門口接觸社區，亦都希望咁令社會大眾了解更多殘疾人士嘅需要。
希望今次唔係咁開心嘅食飯經歷，可以喚醒唔同持份者關注無障礙設施，共融從來都唔係口號，設施從來都唔係喺check list上面做咗就算，亦唔希望因為今次係何宛淇嘅經歷大家特別關注，希望大家日後關注社會上唔同弱勢社群嘅需要，多謝大家！」
平機會：對事件非常關注
平機會發言人回覆《星島頭條》表示，對事件非常關注，但不會就個別事件作出評論。若有市民懷疑受到《殘疾歧視條例》下所指的歧視對待，可向平機會查詢或提出投訴。
《殘疾歧視條例》訂明，任何人若在條例適用的範疇內基於某人的殘疾而作出歧視，屬違法行為。訂明活動範疇包括：僱傭、教育、貨品、服務及／或設施的提供、進出處所等。
若服務提供者在沒有合理理由下基於某人的殘疾拒絕提供服務，導致他們遭受較非殘疾人士為差的待遇，除非服務提供者能證明提供相關服務會對他們造成「不合情理的困難」，否則可構成違法歧視。
