借錢呃食黨新招登場 Gel頭大叔竟用呢個藉口討飯錢網民爆料：肆虐屯門｜Juicy叮

時事熱話

更新時間：09:47 2024-11-07
發佈時間：09:47 2024-11-07

「借錢呃食黨」近日有新招數登場，市民要提高警惕。根據網民在facebook群組「屯門友」報料，早前在區內居屋屋苑龍門居遇上一名白衣黑褲「Gel高頭髮」的中年漢，對方聲稱從深圳來港後與友人失散，由於身無分文，因此希望施舍飯錢。

針對懷疑「呃食黨」出沒，網民奇怪從深圳來港玩，竟然「失散到入咗龍門居」，認為都算係「奇景」；區內街坊並作爆料式回應，排隊講述自己曾遇上「借錢呃食黨」的種種經歷。

借錢呃食黨逐張睇＋網民爆料式回應↓↓↓↓

樓主在帖文中敘述情況：

「大家要注意下，大家要警惕，龍門居有大陸借錢黨出沒，話自己從深圳過嚟玩，同朋友失散咗，而家等緊朋友嚟接佢，想借錢食飯。白色T恤，黑色褲，Gel高頭髮中年講普通話嘅男人（Sorry，冇影低相）呼籲啲老人家要小心」。

「呃食黨」肆虐屯門

回應的網民皆眉精眼企，認為「呃食黨」已遍佈全港，在屯門尤其肆虐，「呃食黨」蹤跡遍及區內的碼頭、港鐵屯門站、置樂花園、翠寧花園、美樂花園、盈豐園、大興邨、友愛輕鐵站、兆康、工廠區，當中還有人拍攝到另一名懷疑「呃食黨」女騙徒的背影。

不少屯門街坊大爆自己偶遇懷疑「呃食黨」經過，指「工廠區都有」、「西鐵站都有」、「友愛輕鐵站都有」、「大興邨都有借錢黨出現」、「曾見過屯門站搵獵物」、「碼頭區都有兩個女人攞錢食飯」、「兆康都有啦！仲一家三口添！」、「翠寧都有、已年青化、沿途有你、大家小心」，且愈講愈詳細↓↓↓↓

借錢呃食黨逐張睇＋網民爆料式回應↓↓↓↓

網民爆料愈講愈詳細

「我昨天也在屯門偶遇過~我説我窮過你！」、「我昨天在碼頭區遇到，兩個國語女人，話無錢都食飯」、「好耐啦，幾個月前已經有啦，屯門碼頭有，我望佢幾秒恥笑佢」、「河田，市中心經常遇到！通常兩個女人，一老一嫰，已經Ｘ過好幾次！」、

•「早幾日大興邨有兩個女人大約40（歲）左右四周圍問人借$50元食飯」、

•「兆康果條分明係港地道友啦。早幾年之（前）問我拎$5蚊，我話畀我打你兩拳就畀你，佢二話不說就閃走，無禮貌」、

•「我（10月）27號星期日傍晚6點左右在美樂都發生過，個大陸佬重有個女拍擋架，又係白衫黑褲，我講了句：你XX搵食行遠啲啦」、

•「我住屯門舊年試過一男一女，大概夜晚10點鐘度，佢話搵朋友冇錢食飯叫我畀$50蚊，畀咗$50蚊佢又話要多$50，之後叫我同你搵賓館住，我就已經覺得有問題」、

•「星期一晚係盈豐出面都好似係呢個女人截停我，以為佢問路，點知話第一次嚟呢度旅遊，但微信壞咗，未聽完我講咗句拜拜就走了。旅遊遊到嚟盈豐都唔知邊個編行程」、

•「我都在置樂遇到一個，本人唔太明普通話，不過隱約聽到佢提及『饅頭』，我咪話帶佢一齊去買囉。不過最後去到間舖休息，佢又話唔耽誤我喎，事情就咁不了了之。可能我明啲唔明啲，避過一劫啩」。

對於以上發生在屯門區內的種種，有網民於是索性表示「呢個問題屯門區周圍都有啦」，還有人稱「元朗都有」、「以前一早有喺太子旺角」。

借錢呃食黨逐張睇＋網民爆料式回應↓↓↓↓

網民提供對付騙徒妙法

你有張良計，我有過牆梯。對「呃食黨」看不過眼網民都熱烈提供看家對付騙徒妙法↓↓↓↓

「買個兩餸飯叫佢即場食畀你睇」、「我會直接講，而家香港好多餐廳都收支付寶、微信支付，唔需要現金都食到飯」。最多網民表明會報警—— 「冇錢？同朋友走散？幫佢打999」、「交畀警察」、「帶佢去警署幫佢」、「我會建議佢搵警察協助」、「遇到呢啲人，第一時間就梗係搵警察啦。等警察幫佢哋囉；同事最好就影埋佢哋個樣，等啲警察容易搵到佢哋！」。