屋邨幼稚園驚現「BB車龍」掀議 網民：細路對腳用嚟裝飾？家長：生過仔先會明｜Juicy叮
發佈時間：16:35 2025-03-12 HKT
有網民昨日（11日）在屋邨幼稚園門外，驚見泊滿長長的「BB車龍」，他將奇景照在網上分享掀起極大迴響，樓主問：「細到唔識行？」有網民亦奇怪：「呢個年代好多細路對腳都係用嚟裝飾？」但不少家長留言反駁：「生過仔先會明，小朋友扭計要抱抱，車車係恩物！」
有家長指出：「當你湊住一件2-3歲...又要去買餸，買日用品，又怕佢瞓，BB車係救命草來。」事件掀起熱議如下：
屋邨幼稚園驚現「BB車龍」掀議 網民：細路對腳用嚟裝飾？家長：生過仔先會明↓↓↓↓
樓主昨日（11日）在社交平台Threads發帖，分享一張屋邨幼稚園門外，泊滿長長的「BB車龍」的照片，該「BB車龍」靠著幼稚園的牆邊一前一後，秩序井然地排列，車內無人，估計為家長暫泊門外，可能在等小朋友放學時使用。
樓主在相中寫著：「我真係唔識，泊滿晒車車B。」他在帖文中表示：「常態？而家返幼稚園的人太細？細到唔識行？」
家長：BB車有實際需要 籲要有同理心
帖文引發熱烈迴響，有育有一女的網民表示：「呢個年代好多細路對腳都係用嚟裝飾，小學仲坐BB車返學都唔少啦......」有網民表示：「喺地鐵見過5、6歲小朋友坐BB車！仲唔只一次。有時諗，而家啲小朋友真係矜貴。」
不過，不少家長留言呼籲樓主及持批判意見的網民要有同理心，BB車對於家長接送幼稚園小朋友有實際需要：「一咁講就知你一定無小朋友，完全無同理心，唔阻到人有咩問題。」
同場加映：搭巴士拒收BB車鬧司機有病 車長一招霸氣收伏女躁客 網民激讚：應該係咁！：↓↓↓↓
網民：有N班呢樣嘢 唔好成日咩嘢都網絡公審
「唔好話N班，有K1嘅細B小朋友，放咗學會攰，再者人哋屋企未必住到同幼稚園咁近嫁，攰起上嚟阿媽要抱住又拎書包，好大機會買完餸等小朋友放學，有架車除咗比小朋友瞓吓覺，大人放下嘢，唔好成日咩嘢都要網絡公審啦。」
「當你湊住一件2-3歲...又要去買餸，買日用品，又怕佢瞓，BB車係救命草來。」「小朋友放學返屋企眼訓，你有冇試過抱10幾20kg米行返屋企？仲有好多係屋企長輩照顧呢。」「同埋你知唔知有N班呢樣嘢，得2歲幾放學仲會恰眼瞓，拎架BB車俾佢瞓覺係咪都阻住你？」
「做人要有同理心同底線」
「唔好講笑，我細女就嚟4歲放學，我都會拎BB車，我接完放學買嘢，又唔怕佢要我抱，去遠啲去足全日，我都會帶車，真係吓吓抱到咁耐咩。」「做人要有同理心同底線，呢個世界唔係全部人都係supermom，同完美小孩，亦都有好多自閉兒童需要坐BB車，呢D細路有權利接受教育。」
「生過仔先會明，小朋友扭計要抱抱，車車係恩物！泊係到又可以當排隊，趁呢個時候去隔離街買菜，返嚟接放學十分完美。」
同場加映：沙膽女BB車推細路巴士前「散步」 車長要「咁做」先返上行人路↓↓↓↓
