拍拖6年擬拉埋天窗 男方只肯影結婚相 港女一再退讓：淨搞觀禮 準新郎堅拒 絕情說出6個字......｜Juicy叮

待嫁姑娘本應甜蜜開心，對未來新生活充滿憧憬，但有港女卻在答應男友求婚後，雙方在籌備婚禮上出現分歧，加上準新郎拋出了一句狠話，令這位準新娘委屈巴巴，在無計可施、無人可傾訴底下，唯有在網上發長文大呻，並徵詢網民意見。網民也如實地講出心底話，特別提醒要警惕「戀愛腦」。

樓主在長文中提到，拍拖6年，與男友準備拉埋天窗，但原來男方的底線是只肯影結緍相，堅拒其他婚禮的細節流程，即使準新娘一再退讓要求只搞觀禮，也被對方拒絕，且還絕情地說出令人心碎的6個字。詳情見下圖及下文：

拍拖6年擬拉埋天窗港女為婚禮一再退讓逐張睇↓↓↓↓

樓主早前在社交平台Threads發帖詳細講述事件：「我好攰，我搵唔到人去傾訴呢件事。我同男朋友一齊咗6年，早幾日佢向我求婚，求婚嘅場景係我想像過嘅，所以我都開心咁答應咗。

不過我無第一時間公布俾親友知，因為我想先同佢傾吓大家對婚禮嘅想法同安排，確定到一啲嘢先公開。

我話佢知我理想係細搞嘅輕婚禮，大約邀請40-50位最親嘅家人同朋友，唔擺酒，淨係請佢哋觀禮證婚，之後影下相，食吓小食咁，我問佢會唔會諗住約我哋兩家人食餐飯先。

而佢話佢咩都唔想搞，好討厭婚禮嘅細節流程，一嚟佢親戚朋友唔多，唔想做show（表演），二嚟佢覺得呢啲嘢嘥錢，留番喺未來生活用好過，佢唯一接受到嘅就係影結婚相。

我話：咁如果只係刪減到得觀禮部分呢？
佢話：sorry（對不起），做唔到，你去搵其他人。

有無人明呢番說話令人幾心痛，我哋連結婚第一個共識都未達到。當然我明白結婚係兩個人嘅事，但我都想有啲儀式感去慶祝，你話係場show都好，但我都想做一次人哋眼中嘅新娘，接受最愛嘅人嘅祝福，唔知點解好似都係錯，我以前都有向佢提過下想結婚邀請家人朋友，佢都無say no（說不），所以嗰吓聽到咁我好唔開心。

但我真係愛佢，一方面我唔想為難佢，但另一方面我覺得我如果我繼續退讓，我個心會留低遺憾。有無過來人可以俾意見我......」

網民坦蕩蕩地講心底話

寧教人打仔，莫教人分妻，但鑑於關這事正處於關乎樓主終身幸福的人生交叉點，回應的網民都不講客套話，坦蕩蕩地講出心底話，指「搵第二個啦，根本唔夾」、「條仔都黐，咁都講得出口」、「叫你搵第二個喎，可以唔使結啦」、「我諗你應該聽佢講，咁你搵過第二個」、「兩家人食飯唔係好普通？佢好似好難為」、「不要為嫁而嫁……未嫁都睇得出佢幾自私」。

不少網民更加心細地作詳細回覆，像感情顧問般把事事一碼一碼地攤開慢慢分析↓↓↓↓

•我覺得婚姻呢件事可以有不同意見，但要識用大家都接受嘅方式攞出嚟討論，而唔係單純地一邊遷就一邊，我想搞，你唔想搞，一係就我說服到你一齊搞，一係就你說服到我一齊唔搞，咩叫做「咁你搵第二個」？

•而家分歧係婚禮形式，之後會係生唔生仔，生完仔租樓定買樓，買樓嘅話買邊一區，會有好多唔一致嘅時候。作為女人，我唔希望你戀愛腦淨係揀個你愛嘅男人，應該揀個你愛佢，同時可以一齊和諧相處地走落去嘅男人，跟住一個愛嘅人，而同時又可以相處得好先係真正嘅幸福。

•如果同親友食個飯都難為佢的話，信我，不要浪費青春。老套啲講，真正愛你的就算佢心裏唔鍾意都會陪你的，結婚真係唔止係兩個人嘅事，未嫁就要委屈真係唔好嫁。

•就聽佢講，咪搵過第二個囉，淨係憑呢句都知道夾硬結婚的話，後果係，唔開心只有你自己。我寧願一個人開開心心過日子，今日愛佢啫，諗住呢句嘢作為動力，你就會愛少啲，減減下就可以負分，今日愛啫，你下年愛唔愛？3年後愛唔愛？佢都冇諗過你啦，你使乜諗佢呀。

•就算應承咗都唔一定要同呢個人結婚㗎喎。係咪一定要同呢個人結？聽落你哋都唔似有商有量，似您諗要點樣去遷就佢多啲。不如您問下自己日常生活佢對您行為模式係咪都係咁？如果係，結咗婚只會越嚟越多呢種您一個人退讓嘅情況。上錯車早啲落車返屋企條路近啲啊，越搭越遠車費只會越嚟越貴。

•其實你真係要三思，呢啲男人完全冇商量，一句就叫你搵第二個。其實佢就係睇死你同佢拍咗6年。你又想結婚 所以點都會硬食，遲吓結埋婚生埋仔，佢更加覺得你走唔甩，到時情況會更惡劣。記住，你係要搵一個可以同你一齊解決各種困難，互相遷就嘅伴侶，而唔係要一個完全冇計傾嘅男人。

•好好思考下呢6年你哋嘅相處，佢嘅好/唔好，你會唔會係捱打個方？遷就嗰個，配合嗰個，包容嗰個？已經過咗6年，你會唔會想下一個6年，佢依然用呢個態度同你相處？唔好妄想男人婚後會變！You deserve better（你值得更好）。你值得擁有一個夢寐以求嘅婚禮，你值得所有親朋好友嚟你婚禮祝福你，你值得擁有你想要嘅幸福。

•就算結咗，呢個位會在心中令你一世都有嘢銀住唔開心。借呢個主題測試下你兩個有冇能力共同解決問題，如果咁都解決唔到證明你哋唔適合行一世。條路自己揀。

不過，也有網民站於準新郎一方去看，指「有可能個男仔唔夠錢搞咁多嘢呢。要知多啲內情先可以分析到。有時男仔財政壓力大唔想講咁多俾身邊人聽都會咁」。

資料來源：hongkongdating2021＠Threads

相關閱讀：大吉利是！花逾十萬尖沙咀5星酒店搞婚禮 新娘被安排「14樓」出閣 港女怒轟酒店三宗罪：咁賠償當我哋乞丐？

有港女花逾十萬元在尖沙咀一間五星級酒店辦婚禮，結果換來一肚氣，她在社交平台怒轟酒店三宗罪，最離譜的是出閣大喜當天，新娘竟被逼要在「14樓」的房間出閣，非常大吉利是。

女事主說，當日辦理入住手續時，酒店解釋原定套房未能即時給她們，要她們改住14樓房間，竟是因為需時鋪「紅床單」，但事主入住14樓套房後，卻發現裡面床鋪仍是「白床單」。港女又透露酒店最後提供的賠償方案，直斥是「街市講價」「當我哋乞丐」。