祖馬龍心水│「快狠準」冷勿盡忘

更新時間：18:50 2024-11-16
發佈時間：18:50 2024-11-16

剛過去的周三賽日，天文台殺馬迷一個措手不及，晚上在毫無先兆之下，突然宣布數小時候後懸掛八號風球。馬會又犀利喎，轉數夠快，當天文台宣布呢個消息唔夠半個鐘，就已經決定腰斬賽事。祖馬龍比較熟悉銀行界，金管局有嚴格指引，銀行需要有嚴謹而有效嘅業務韌性。馬會作為一所管治嚴謹嘅機構，亦有一套相關災難恢復指引。講到咁深奧，不如講個簡單嘅比喻，即係屋企食緊飯，無啦啦有個大恩人親戚話半個鐘頭後想上嚟家訪坐吓，本身屋企食緊鹹魚，開咗磚腐乳，全家爬緊白飯，阿媽一聽到消息就突然企起身衝去廚房摷返罐車輪鮑出嚟，即刻浸乾瑤柱，將本身聽晚食嘅生菜攞出嚟洗，加多味餸，招呼大恩人親戚。呢個咁快嘅反應一定係來自於平時日子有功，喺海味舖特價嘅時候上定糧餉。

當然，今次安排亦有唔盡善盡美嘅地方，但喺安全嘅大前提下，疏散員工，及時運走馬匹，安頓顧客免費請會員食餐飯，祖馬龍對呢個各方面嘅平衡予以肯定並高度評價。

今日中銀賽馬日嘅天氣，相信都係持續不穩定，刨馬嘅時候需添加些少幻想。祖馬龍跟咗「快狠準」好多鋪，發覺上季匹馬升上三班後未必適應到步速，今季練馬師非常謹慎，操好都等到十一月先出。翻查數月晨操記錄，此駒並無缺課，睇嚟健康正常，呢鋪排六檔預計守二疊有遮擋，今次賠率唔會熱，博隻馬暑假大幅進步，投注策略輕注位置，陰晴不定嘅日子小賭怡情。

第十場：4安康萬里、2駿奕快車、3同樣美麗
第十一場：12快狠準、5開心寶寶、6競駿先鋒

↓立即下載星島頭條App↓