祖馬龍心水│「真心傳奇」投注良機

更新時間：18:57 2025-03-22 HKT
發佈時間：18:57 2025-03-22 HKT

夜晚有時瞓唔着，開電視睇吓重播劇集，劇集內容唔會特別記得，但中段廣告時間，最記得反而係「黑旋風」、「香港腳發作」等多個廣告嘅對白。慶幸祖馬龍一世都未有需要用呢類型產品，而廣告嘅最大威力，就係響最不經意嘅時候注入觀眾嘅潛意識。今日未用到呢個產品唔緊要，聽日、後日，或者十年後當屋企出現曱甴嘅時候，就會諗起呢個牌子，創造商機。

同樣地，寶馬贊助香港打吡大賽，大家未必有機會揸寶馬，但一想起句口號「四歲功名，一生一次」，就不期然會想起打吡，繼而想起寶馬呢個品牌。或許就係呢個賽日中咗三T，諗唔到點使錢嘅時候，就會無啦啦買咗架寶馬都未定。

祖馬龍對打吡無咩睇法，主要係支持「球星」，呢鋪檔位靚，而最強對手「祝願」排大外檔，未跑已經贏半球。

假如各位有打吡心水，不妨孖寶下射第八場「真心傳奇」。以「輝煌精英」喺三班頻頻入位嘅水準嚟做尺，加上上場賽道比較利內疊前置，以後追跑法嘅「真心傳奇」僅僅輸畀「輝煌精英」一條鼻毛，喺今次賽事絕對夠用，大外檔都冇有怕，只係最驚塞車，假如因為呢個外檔而分多幾蚊，呢鋪就係投注良機。

第七場：1球星、2祝願、10遙遙領先
第八場：3真心傳奇、4巴基之勝、2奇異果

↓立即下載星島頭條App↓