祖馬龍心水│「不同世界」尾場穩膽

更新時間：18:46 2025-03-29 HKT
發佈時間：18:46 2025-03-29 HKT

早幾日嗰集《排位餸飯》請咗位極富娛樂性嘅嘉賓上嚟，有朋友話佢講說話搶口，亦有人話佢有種君臨天下嘅感覺。的確，佢嘅態度係有少少招積，但確實係有值得驕傲嘅理由，例如佢其中一張中獎彩票，係以十元八塊贏咗五萬蚊，成功刀仔鋸大樹！

呢位嘉賓分享賭馬心得，以自身經歷去批判過分倚重睇飛所遇到嘅弊處，舉例自己隻心水馬臨場飛數冷落，終於轉投另一匹臨場有飛、但機會次一等嘅馬，但結果跑出自己放棄咗嘅心水馬，相信多數馬迷都有類似經歷。而得出結論，就係應該信自己多過信飛，先唔好理中唔中，起碼跑完出嚟唔會揼心。

今日祖馬龍心水係「不同世界」，呢匹馬近期贏馬或跑得接近，臨場都無大落飛，假如投注人信飛多過信自己，隨時因此走寶。祖馬龍認為「不同世界」係非一般嘅打仔馬，上場末段同「有目共賞」碰撞，賽後發現左前腳甩蹄甲，若非賽後報告指出，單睇佢末段衝勢難以察覺賽事際遇嘅小風波。前一仗佢能夠力壓後來贏馬嘅「穿甲戰鷹」，今場即使預料成大熱，又或者潘頓復出狀態未十足，甚至有眾多三班強手，我都只信「不同世界」。

第九場：5跨境寶馬、8順成之星、6新力好
第十場：8不同世界、1信心星、3巴閉仔

↓立即下載星島頭條App↓