君如爆囡囡有天分做幕後　被影癡女兒問到口啞啞

更新時間：09:06 2017-07-07
發佈時間：09:03 2017-07-07

第1屆香港兒童國際電影節暨香港兒童國際電影節嘉年華由DotAsia機構、高先電影有限公司及ELEMENTS圓方聯手主辦，並請來吳君如擔任本屆電影節大使。

文：鄺芷瑩圖：譚志光

作為母親的吳君如表示，女兒陳是知自懂得看電影以來便陪伴看兒童電影，家中亦收藏了大量VCD到DVD年代感覺好似博物館，試過執拾物品發現錄影帶。她說：「我同個女講，我點搵部機畀你？我們經歷過不同的鐳射碟，已經將它入晒箱。」她坦言與另一半陳可辛的工作關係，女兒好難不會接觸電影，最開心大家現在觀賞電影後會互商討論，更試過陪伴女兒睇了5次電影《玩轉腦朋友》。君如說：「佢跟同學睇一次要同我們分享，佢覺得自己睇完，我沒有參與返去無偈傾，於是我同佢分享，就遇着爸爸不在港，又要睇多次，總之佢要我們齊腳一齊分享一次。有啲戲睇4次，因為要跟朋友分享，我同佢講跟朋友分享唔使我去㗎？佢話咁邊個帶我去呀！那段時間我好忙，入到戲院遊緊魂無跟足睇對白，出來佢講番劇情，我問嗰段咩嚟，佢就話咁緊張無睇到？點知又睇多次。」

睇完問感受

君如笑言剪輯後的宣傳片，也會讓女兒過目並問及感受，又指女兒睇完《12金鴨》覺得好驚喜，因為不明白角色的職業，只認為媽媽變成了男人，感覺有特技好有趣，亦會趁機會親子活動解釋這個世界有好多不同人種同生活。她說：「佢都有問我點解搞到個胸咁大？我話係一個角色設計，呢個職業好難解釋，但我好簡單話職業係你畀錢佢會表演一些事，令你覺得好開心。」她又指女兒對幕後工作也感興趣，有時到片場探班看見器材覺得驚喜，所以學校將會有課外活動讀製作，女兒指也想參加，自己也不會抗拒，又認為女兒在這方面絕對有天分。

為了籌備本屆電影節，高先電影有限公司董事總經理曾麗芬於各地搜羅來自不同國家的精采電影，讓不同年齡層的小朋友及青少年的觀眾欣賞。她坦言培養小孩睇電影應從小開始，現時不少出名的卡通片或電影屬於外國片，故想小朋友可以認識更多不同國家文化電影，又指為了首屆兒童電影節要睇好多不同電影搜羅返來，當參與各地影展購買優質電影外，也要留意適合香港小孩的電影。

化妝︰Midco Chu

髮型︰Seiko Sin @ Hip Hair Culture

場地︰ELEMENTS圓方

鄺芷瑩