【頭條獨家】變身「Ginger Queen」做網台主持余迪偉分享跨性別愛情觀

更新時間：09:59 2020-12-26
發佈時間：22:46 2020-12-25

「Ginger Queen」要靚唔要命，為了靚就算扯甩晒頭髮都堅持戴鹿角上頭。

余迪偉最近變身「Ginger Queen」主持網台愛情節目《夠薑•卜一卜》，每集節除了有不同愛情主題，跟另一主持搭羅師Sandy一齊討論，之後會接聽觀眾來電，解答愛情中的各式各樣難題。迪偉以「Ginger Queen」華麗造型接受《頭條》訪問時，堅稱並非迪偉，仲話自己靚過對方好多，又話不知自己真正性別，但反而更能分析跨越性別界限的愛情觀，相當搞鬼。撰文：杜淑霞場地：帝樂文娜公館

這條連身裙太窄，「Ginger Queen」差點透唔到氣。

節目中，「Ginger Queen」跟搭羅師Sandy一齊討論愛情話題。

首先問「Ginger Queen」性別，他竟然話：「其實我覺得冇所謂，自己都唔知，雌雄同體都冇問題。」談到跟迪偉關係，「Ginger Queen」直指同對方唔多熟，「我哋識咗10年啦！佢根本摸唔清我個底，因為我喺佢人生裏面突然間先出現。（今次做主持有冇問迪偉意見？）我冇喎！我覺得我好有信心，唔需要佢嘅意見。」

自稱跟男女也有拍過拖的「Ginger Queen」就直言來者不拒，「兩樣都有，我來者不拒嘅，所以我好多經驗，男男女女嘅經驗我都有，我喺呢方面係專家，幫人解決到疑難，畀到意見大家。」他更表示觀眾不怕他太mean，更有人專登打來給他鬧，「有啲人係鍾意畀人鬧醒，有啲觀眾係專登打嚟話叫我鬧醒佢，有啲人畀阿爸阿媽或者好朋友鬧都係唔得，係要畀個三九唔識七鬧好哋哋嘅，人有時就係咁犯賤，我就係要捉住呢個犯賤心理，底蘊係要幫到佢哋。」

自稱不知性別的「Ginger Queen」，話跟猛男和靚女都拍過拖。

每集節目，「Ginger Queen」以不同華麗造型現身。

狂踩迪偉未夠班

雖然「Ginger Queen」自稱初出道，但問到跟迪偉比較誰做主持較出色，他即相當唔客氣話：「梗係我啦！仲使問嘅！我唔係話佢唔得，佢做得唔錯嘅，喺佢10幾年嘅廣播生涯，我都有聽嘅，佢嘅優點係睇事情睇得好通透，但喺愛情方面冇我睇得咁通透，因為佢成日比較一面倒咗，我嘅優點係比較平衡到兩面啲，因為我兩性都熟識，同埋做愛情節目嘅主持，係要抽離啲去睇，當你拉濶啲，所有事情睇法都好唔同。」

「GingerQueen」在每集節目都以不同華麗造型現身，靚衫共花了六位數度身訂造外，原來他事前做了護膚和健身，還努力勁減超過10磅配合造型，「平均每次都要整兩個鐘裝身先可以出鏡，但好彩我有自己團隊幫手，但好似今日呢個頭飾好重，係一個好惡嘅鹿角嚟，因為『Ginger Queen』比較寸同惡，所以我揀咗呢個造型嚟做訪問，無論用咩方法都要戴，就算可能會扯甩晒我啲頭髮，我都會照戴。（有冇畀迪偉睇？）畀咗相佢睇，佢話OK啦！仲話佢着靚啲，我話冇可能囉！一定係『Ginger Queen』靚啲，因為我嘅嫵媚，迪偉係冇嘅，佢受唔到呢啲妝，我啲皮膚同身形都靚過晒佢，佢行開啦！佢想搞都搞唔到，天生麗質嘅嘢，邊有得整嘅啫！」