孔德賢連剝四隻智慧齒變青蛙臉 腫到擘唔開口自覺似巴斯光年
發佈時間：12:30 2022-05-03 HKT
24歲TVB「小鮮肉」孔德賢（Danny）喺社交網上載咗輯腫到似「青蛙腫臉」相，見佢面頰激腫，真係超級恐怖，腫脹到個口都擘唔開。Danny圖文並茂分享一次過剝咗4隻智慧齒嘅慘痛故事，還標籤「啲人話剝牙會瘦唔知真定假」、「一生人一次」。
Danny話其實7年前讀大學睇牙醫時，牙醫已經建議佢盡早剝咗啲智慧齒，如果唔係會點點點…講到好誇張：「咁我呢個拖延症末期病人當然當牙醫無到，幸福快樂咁生活落去。結果7年後，上排兩隻智慧齒因為太入擦唔到蛀晒，下面嗰兩隻打橫生，仲要得一半出咗嚟，積住啲細菌搞到定期發炎，提醒我，(有)佢哋嘅存在。」
最後Danny把心一橫，唔想再煩決定剝牙，佢憶述躺臥牙醫牀跟醫生對話，醫生問：「想剝幾多隻？」佢反問：「可以剝幾多隻？」醫生就話：「4隻囉，唔洗煩，都係咁剝，好簡單。」
Danny好記得：「剝之前牙醫拎住一隻又大又粗嘅麻醉針，打咗6，7吓，其實唔係咁痛，然後慢慢成個口就冇晒感覺。只係聽到好大聲嘅電鋸聲同埋吸口水嘅聲，仲有感覺到牙醫好大好大力咁撬我啲牙，嗰種恐懼感，同做激光矯視差唔多，都係嚇到標冷汗。好彩個醫生出名手勢好（收費貴），10分鐘剝晒4隻，完全唔痛。」不過，當佢做完個手術出返去，啲姑娘好似好擔心咁係咁問佢：「『有冇頭暈頭痛想嘔？』我心諗：咁大鑊？唔好嚇我呀。佢哋仲提我要不斷吞口水，『雖然你feel唔到個口，但啲肌肉有感覺，如果唔係會流晒啲口水出嚟。』」另外，姑娘仲提佢要不斷敷冰，如果唔係會腫到比卡超咁。他聽到之後仲好興奮，話好想睇吓自己會變成咩貓樣。
豈料手術後第一日個口麻痺晒，完全feel唔到任何嘢，好似冇咗個嘴咁，個口擘唔大，只可以食到蛋糕仔，魚生，飲水都有啲困難。
第二日開始腫到好似含住啲嘢咁，個口依然擘唔開。全日都係食粥，同生果，連食菜同肉都要剪碎佢，好似啲BB咁「妹」吓「妹」吓先吞到，好辛苦。但我自己就覺得似巴斯光年多過比卡超。
第三日好彩冇再腫落去，個口開始擘開到，可以食到少少唔係流質嘅嘢。同埋感覺到口腫個個位入面有啲液體係到浪嚟浪去，咩運動都做唔到。
5月2日第四日都係食唔到飯，只可以「妹」吓「妹」吓咁，仲未消腫，仲要個口生晒痱滋。開始轉咗暖敷，用冬天剩返嘅暖包照係塊面到，增加血液循環快啲消腫，希望快啲好返啦。
更多第5波疫情資訊，請到以下專頁瀏覽（按此）
立即下載 | 全新《星島頭條》APP : https://bit.ly/3yLrgYZ
