梅小青睇好陳展鵬鮑起靜奪視帝視后 方俊下月為張偉文擺大壽送溫暖
發佈時間：23:51 2022-11-22 HKT
張偉文經理人方俊媽媽麗麗姐日前90大壽，前無綫「金牌監製」梅小青、姚煒、張偉文、胡渭康、環星娛樂老闆張國林等出席賀壽，席間梅小青開金口跟方俊唱出《漫步人生路》；張偉文和方俊又合唱《每當變幻時》，姚煒及小青姐從旁打氣，曾患過新冠肺炎嘅張偉文十分精靈。
之前梅小青接受鄭丹瑞節目訪時，自爆曾患上初期膀胱癌，左腦有血管又塞咗95%！幸能及時作適切治療，故完成《法證先鋒IV》後退休。問到現時健康狀況？小青姐笑晒口形容係十分好，她好開心報平安：「我有Keep住去做檢查，醫生話我樣樣都好，健康仲好過佢喎！」至於會否重返拍劇？她表示有keep住義務寫劇本，又大讚最近TVB啲劇集好好睇，尤其喜歡鮑起靜啲戲。
以小青姐專業眼光，今年視帝、視后又誰屬呢？她坦言一向鍾意鮑姐：「我有睇《下流上車族》，佢嘅戲一直好感人，以往同佢合作過《法證先鋒IV》，佢啲戲超正，搞到我完全唔記得嗌Cut，好鍾意佢。至於心目中嘅視帝、視后有好多，但特別鍾愛係陳展鵬。展鵬喺《超能使者》中做得好好，而且個劇本畀機會佢表現，佢又捏拿得好好；鮑姐係視后就開心，(兩個係膽？)係我期望啫！」不過，最後小青姐都戴返個頭盔，強調得獎仲要配合其他因素嘅。
張偉文冇長新冠愈嚟愈精靈
另外，病癒後嘅張偉文慶幸冇出現長新冠症狀，而且愈來愈精靈，下月21號係張偉文70歲大壽，方俊決定喺酒樓包場，筵開20席為張偉文擺壽宴慶生：「疫情下幾年未能聚會，好多歌迷及朋友對偉文健康非常關心，所以今次以70歲大壽作為主題，等大家同佢慶祝吓。」張偉文跟方俊情如父子，方俊再說：「佢長住老人院比較悶，希望佢能感受到歡樂及朋友對佢嘅愛，令佢更有動力，明年再做演唱會。」
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
