76歲劉江親揭離巢TVB真正原因比喻「帶小朋友做戲」：得罪好多人

更新時間：10:00 2023-03-08
發佈時間：10:00 2023-03-08

76歲的劉江在2019年出席《萬千星輝頒獎典禮》時宣佈約滿後離開TVB，結束38年賓主關係。劉江與呂珊早前接受由楊紹鴻主持的港台節目《一起走過的歲月》訪問，主持問到當年離開TVB的其中一個原因是否因為沒有好對手，他直認不諱：「係！冇錯，真嘅，唉，如果要講呢會得罪好多人，唔好講喇！大家都喺呢度搵食㗎嘛，好戲嗰啲未必擺埋一齊，所以我撞親都係嗰啲，哈哈哈，即係我帶住一班小朋友去做戲，OK？就係咁簡單。」

【點擊睇劉江過往劇照】：

人稱劉老師的劉江在1970年代出道，曾經效力佳藝電視、麗的電視，1982年轉投無綫，拍攝過不少劇集，直到2020年約滿無綫，劉江決定不再續約，結束38年賓主關係。在節目上，主持人問到是否「小朋友」不聽話？劉老師表示基本上他們都很有禮貌聽自己講：「只係冇乜改進咁解囉，我哋就幸運啲，講個例子，我喺1960年代訓練班出嚟，有齣劇開，我做壞學生，但喺畢業禮上，導演要我好感激校長、老師嘅教導，要一個好感激嘅表情，我就腳軟啦！但老演員就話，『小伙子唔使驚，OK嘅』！咁我咪拍囉，我攞住證書，同佢握手時，對方突然好大力咁握我隻手，好大力㗎！咁我就做咗一個表情，導演話good take，『有潛質』，呢啲就係佢帶住你。」在旁的呂珊說：「劉老師去到現場，on機時，佢就會有啲突發嘅演技會震撼到你，你就好自然發揮到真感情，如果唔係對戲都冇用，對白就梗咗，而演繹方法有幾十種，所以佢話要交流，遇到高手交流就係咁。」

眾所周知，無論拍電視抑或拍電影，都不時出現「飛紙仔」情況，劉老師直言這風氣是不健康，「有一次，我等外景出發，等等等，最後飛咗紙仔嚟，我一睇，呢啲對白已經講過，監製同我講︰『你唔好搵個放大鏡去睇至得㗎，呢張紙仔係某某飛畀你，係有名編劇，你仲想點樣？』有次我演盲嘅老和尚，劇本入面有啲唔知咩經文，我唔識呢啲，又唔識分句，於是上網搵，睇吓點發音，突然間PA走埋嚟，佢話︰『唔好意思，嗰啲經文唔啱，你係唸心經。』咁我點呀？修哥（胡楓）話唔緊要，搵人寫大字報，我話我盲㗎喎，合埋眼，我點望呀？」他表示自己仍然有戲癮，是暫時未遇到心動的角色。

入行多年的劉江經歷過不少起起跌跌，提到最為驚險的一幕，肯定是1980年在麗的電視拍攝《人在江湖》，當時只有33歲的劉老師在開工前夕與老婆和兒子飲茶，期間突然全身不能動，要直接送院，他曾形容當時感到人生快要玩完，因為他腦血管栓塞，全身不能動，連落床去洗澡也要用上1小時，他坦言兒子的年紀很小，堅持要克服中風，一手一腳湊大囝囝：「唔郁得，我死人都郁得，係個信念，最後我做到喇！」幸好入院後9日便康復，自此意識到家人的重要。

劉老師亦曾表示兒子小時候作文更以爸爸作為演員而感到很光榮，不過反而擔心個仔入行做演員：「呢行好辛苦又搵唔到食，嗰仔阿仔去英國讀書連埋生活費，每月最少五萬，我仲要供樓，所以日頭去無綫拍劇，夜晚去亞視配音，到第二朝又返無綫開工，幾乎每日都係咁過，連幾時泊停車場同泊街邊呢啲錢都要計呀，你話啦，不過咁以前你肯做，你話我唔瞓，一定有得你做，而家乜都冇喇，你想做都冇機會。」