中年好聲音｜羅啟豪自爆最新去向！罕談猛料母親與方逸華關係

更新時間：12:30 2023-05-04
發佈時間：12:30 2023-05-04

TVB歌唱真人騷《中年好聲音》賽果已揭盅，綽號「英國豪」的羅啟豪（Ramon）最終勇奪季軍，雖然決賽賽制臨時三變二，只得兩強周吉佩與李佳晉級爭冠軍，令不少觀眾都為他感不丘，但仍無阻其星途發展。日前，為慶祝羅啟豪的「豪吧」粉絲專頁突破1,000人加入，羅啟豪夥好友陳早怡於Facebook直播與網民互動。

【相關閱讀】：中年好聲音決賽丨羅啟豪勇奪季軍！神秘媽咪超猛料曾為方逸華獻唱聯乘國際級大師出CD

【點擊睇羅啟豪背景】：

羅啟豪在直播期間自爆已簽約TVB成為旗下藝人，至於工作則待公司安排。言下之意即羅啟豪暫時留港發展幕前，被問到是否做創作歌手？羅啟豪笑謂：「暫時唔會喇，讀書時試過作曲但唔成功，真係好難。我欣賞同尊敬好多位作曲人，包括倫永亮、杜自持、鮑比達同金培達，我入行目標係希望有機會同呢幾位大師合作。」

提到決賽夜快歌環節破天荒跳唱陳百強的《疾風》，羅啟豪直言擔心到掛住練舞而忽略練歌，隨即被陳早怡大爆練了至少100次，非常勤力！羅啟豪續指，經過6個月面對觀眾、評審的訓練，令他克服了39年來的社交恐懼，踏出舒適圈。

羅啟豪個性難搞年幼時常跟二家姐打架

直播中，羅啟豪又分享了由中一就讀香港華仁書院，轉至英國讀寄宿學校的經歷，他坦言年幼時因經常跟二家姐打交，被家人覺得太「難搞」，結果才被父親送往英國留學，未料後來二家姐也報讀同一間學校：「每次放假返香港度假後再返英國，我家姐上飛機都喊晒成盒紙巾，我都會喊但冇佢咁誇張，我哋家庭好親，所以會好唔捨得。」並謂由於當年跳班讀中三，使要追進度的他好吃力，加上患嚴重濕疹，故不喜歡運動也不熱衷群體生活：「流汗會刺激皮膚，所以我唔鍾意流汗，以前係被迫做運動先會做。」

後來羅啟豪轉到美國升學，他直言：「我唔太鍾意英國，建築好舊，木板行路都有聲，嘢又難食，我同學話想轉去美國讀書，所以我就求我爸爸畀我去。」雖然自幼在外國長大，但羅啟豪卻能操一口流利廣東話，原來全賴沉迷1980至2000年的流行廣東歌和國語歌，陳早怡也大讚他說話甚少中英夾雜，相當尊重語言。席間，羅啟豪還自揭在外國生活期間，曾15小時內兩度撞車，先是自己開的車撞毀，之後租車駕車上班再撞，認真黑仔。

對於羅媽媽劉英（Anne）早前被指是歌手，更曾獲TVB前領導人「六嬸」方逸華邀請上節目演唱，羅啟豪則否認道：「我唔係如網民所講係有後台，我媽媽係曾經差啲做歌手，但佢係冇做到歌手，只係呢十零年有機會同專業歌手喺台上表演，但佢冇簽過任何合約冇出過碟。」又澄清羅媽媽與方逸華只是曾經同場，兩人並不相識，自己也沒跟過老師學唱歌，人生第一個唱歌老師便是《中年好聲音》嘉賓之一的彭家麗，更不喜歡讓媽咪聽到自己練歌：「我練到咁上下都會俾佢聽，佢係會畀意見我，但我硬頸唔會聽，所以絕對唔係師承佢。」