江若琳下月卸貨開心公布BB性別 Oscar膽生毛爆老婆躁底惟有死忍

更新時間：11:30 2023-05-26
發佈時間：11:30 2023-05-26

現年35歲的江若琳（Elanne）與老公蕭唯展（Oscar）去年聖誕節前夕宣布懷孕，下個月便是預產期。近日二人舉行Baby Shower（產前派對），江若琳昨晚（25日）更於社交網公布BB性別，她開心寫道：「It’s a boy. 好多朋友仔都估中左，好叻呀你哋！好明顯我都係一個陀仔樣，希望生完會消腫。」

【點擊睇江若琳派對照】：

江若琳續指，恭喜老公終可父子檔睇波：「呢幾年你成日無限幻想第時有個仔同你去睇英超，你又話要有個仔第時培育佢踢足球，我每次都話有咗先講啦，到有咗嘅時候成日話一定要個仔，恭喜晒，你又夢想成真啦。登登，生煎小王子駕到，以後多個人陪你包生煎包啦，而我又多個男人錫我啦，全屋被仔包圍住好有安全感！因為我兩隻貓都係仔。#多謝我班好有儀式感嘅姐妹團 #送呢個驚喜派對畀我 #佢哋話一定要有welcomebabyparty」相中所見，席間兩公婆又相擁咀嘴，非常甜蜜。

隨後Oscar亦出Po與太太大耍花槍：「老婆辛苦晒，你就快可以卸貨了，呢幾個月真的不簡單，所以你每次鬧我，我都唔出聲，惟有死忍，愛你不需要理由，最緊要你開心，我會好好珍惜餘下兩星期的二人世界，兒子將來一定會是一隻有雀嘅腳仔。」江若琳即爆笑回覆「好煩」二字，大放閃光！