獨家丨陳健朗拍《那年》壓力大暴瘦15磅 提緋聞女友Jace即落閘
發佈時間：08:00 2023-08-25
去年憑電影《手捲煙》奪金像獎新晉導演後，陳健朗首次執導ViuTV劇集《那年盛夏我們綻放如花》，由於預算緊絀拍攝又極趕，超大壓力搞到暴瘦15磅，他希望劇集反應好，未來可拍電影版。提到緋聞女友陳凱詠，阿朗一聽女方名字即封口，「呢啲我唔答你㗎喎！答到打畀你，哈哈！」等你電話呀。採訪：杜杜
阿朗跟編劇何肇康和凌偉駿識於微時，三人組成奮鬥team搞創作。幾年前阿康曾推出連登懸疑校園故仔《已讀不回死全家》，因為勁受歡迎再出實體書，阿朗覺得啱拍劇集，就改編成《那年盛夏我們綻放如花》，「何肇康同我講寫咗本書鬧我，因為我以前成日唔覆message，我睇完覺得本書好有潛質去拍攝，𠵱家改咗唔係現代係Y2K年代，但主線冇大改。」問阿朗有冇打算自導自演？「發掘緊一啲兒時嘅經歷做題材，搵緊有咩情感想透過自己演及導去表達，希望40歲前拍到啦！」
拍劇如玩命
至於阿朗鍾意執導電影定劇集，他苦笑：「我鍾意資源多啲，哈哈！」阿朗認為拍劇有另一種執行的難度，「因為太短，但我喜歡有種慢慢去拍嘅溫度，慢工出細貨，要超高頻率去做，點樣去維持你心目中追嘅質素，呢個先係最難，叫我快唔係唔得，好唔好睇呢？！但有啲場口冇辦法，唯有盡量每集比例，揸到有二分一唔係水過鴨背。」由於壓力大令他暴瘦15磅，「入咗個狀況，掛住諗嘢都唔知有冇食到嘢，個腦用得太勁，仲狂飲咖啡，除非資源鬆動啲，唔係真係玩命，玩唔到好多劑，燃燒生命去製作。」短期內他都不想再執導劇集，反而想將《那年》搬上大銀幕，「希望今次出嚟反應好，有機會拍電影版。」
提到有指陪被環球雪藏的陳凱詠（Jace）到日本旅行散心，阿朗即落閘，「呢啲我唔答你㗎喎！你問我創作任講，感情問題一律不回答，答到打畀你，哈哈！」
《星島頭條》新網站有更多精彩內容：http://www.stheadline.com/
