專訪丨72歲劉永罕談三段婚姻嘆「直播媾女」辜負黎燕珊 與現任嫩妻未離婚70歲做湊仔公
發佈時間：10:00 2023-09-21
每當在網上搜尋「劉永」這個名字時，除了彈出早前的「買樓慘墮騙案」報道外，其餘相關字句幾乎離不開「黎燕珊」、「家暴男」、「劉永前妻」、「嫩妻」等等字眼。事實上，劉永曾經是70年代邵氏當紅小生，李小龍的嫡系弟子， 演藝事業上有過不少經典佳作；愛情上，劉永有過三段婚姻，但都先後分手收場。72歲的劉永接受《星島頭條》訪問，罕有談及過去3段婚姻，包括與首任妻子戴良純的關係、與第二任妻子黎燕珊離婚原因，並透露原來他與第三任內地妻子黃麗燕仍未離婚。
【相關閱讀】：72歲「秦始皇」劉永三度離婚 前妻黎燕珊稱如惡夢一場 臨老遭嫩妻分身家
【點擊睇劉永昔日年輕照片】：
72歲的劉永因為一宗樓宇賣買而險失6萬人民幣訂金，一度成為全城熱話，連帶他過往的相關情史，亦統統被翻出來。劉永受訪時提到他曾經歷3段婚姻，當年有指他因其性格火爆，最終都離婚收場。多次被形容「家暴男」的劉永，聽到外界對自己的形容，他淡淡地說：「而家老咗先講，黎燕珊都知道，我係真係唔會打女人，家暴都冇，我又唔飲酒，點會家暴？我同黎燕珊離婚，完全係因為媾女，我都唔知開咗個電話，畀佢成個鐘頭聽到我喺度媾女，係衰嘅，一個咁嘅老婆，真係衰。」他續說：「我哋年年都有見面，問候下，唔會係仇人，同啲仔女過年咪見下。」
大俠變成慈父新學習做爸爸
劉永在2007年與比他年輕30歲的內地女子黃麗燕結婚，婚後育有2名兒子，可惜因兩人年齡差距較大，婚後不久便出現代溝，最終在2019年分開，一對兒子由劉永撫養，劉永亦由大俠變成慈父，重新學習如何做一個爸爸。「我70年都未湊過仔，未入過廚房，而家，我識煮飯、煲湯，邊個話淨係得女人識煮？我都識，縫針縫線我叻過你，唔識咪學！」最初兩個兒子在學習上有點不適應，劉永隨即變身為「伴讀書僮」，他笑說：「我唔陪佢哋唔會溫，原來做媽咪係唔容易，我越嚟越覺得佢哋個媽咪好辛苦，我以前只係會諗自己拍嘢有幾辛苦，但原來喺屋企嘅都唔簡單，而家唔係我嚟邊個嚟？有乜嘢唔得？得得得，只要分配好啲時間，我得閒會陪佢哋溫書，喺學校溫完，放暑假每日會溫5個鐘書，朝早三個鐘，瞓覺之前兩個鐘，真係追得好辛苦，仲慘過我讀書。」
【點擊睇劉永專訪照片】：
問到與第三任太太的關係，劉永說：「分開嘅時候梗係唔係幾開心，但我經過做佢嗰份之後，喺呢幾年裡面我睇開，我覺得唔應該唔俾啲仔見媽咪，唔係仇人，冇所謂，佢舒服就得，我都70幾歲仲諗乜嘢？我哋冇離婚，星期六、日畀佢哋見吓面，唔會係冇媽媽，只係我哋兩個大人唔可以一齊生活。佢得30幾40歲，我都70幾歲，我哋嘅諗法又唔一樣，緣份盡咗咪算囉。而家我對女人都冇所謂，最主要係傳承到電影功夫，將我所識嘅嘢，教到俾啲徒弟傳承落去。」雖然劉永已經年過70，不過依然充滿大俠風範，但他多次強調自己不再諗女人：「冇諗呢啲嘢，我而家最錫係兩個仔，邊度仲有嗰啲心情去諗？真係冇諗。唔係碰釘碰得多，我有乜嘢女人未見過？乜嘢靚嘅女人都見過，而家不如去食吓好嘢，開心咪睇吓電視睇吓戲，運動下游吓水，咁又一日，有時同啲死黨老友打吓麻雀咪算，冇咗嗰種心情。」
不抗拒兒子畢業後入行
每當提到兩個兒子，劉永的臉上露出罕見的笑容，父子間亦未見有代溝：「我同女人都傾到偈，仔？why not？代溝？唔會喎，我哋好friend喎，佢哋敎好我好多嘢，我大仔高過我少少，16歲，好有型，係『小劉永』，不過好貪靚，細仔12歲。」他還說不介意兒子入行做藝人：「佢拍過幾套戲，好識做戲，但係我而家唔畀佢諗，一定要讀好啲先，讀完書先再諗，做乜都唔緊要，我喺江湖上咁耐，識咁多人，鍾意做乜咪做乜，而家係專心讀書，要用嗰陣就知辛苦。」
回望過去，劉永坦言每段感情分開的時候，一定不開心，他有感而發地說：「第一個好似博命，乜都唔諗，嗰陣太細，冇諗嘢，嗰陣諗住掟啲刀叉兜口兜面整花咗你，冇人要你，只有老公愛你，咪返嚟我度，點知原來仲衰，真係唔識諗， 之後同阿珊一齊，佢係一個好女人，點知『好咗傷疤唔知痛』，咁好嘅老婆唔識珍惜。老咗到而家嗰個，初初諗住係一齊到老，仲生咗兩個仔，係佢要走，不過唔緊要，反正我都諗住退休，咪專心湊仔。」他更不否認目前經歷的一切，全是「因果」，他說：「真係，喺感情方面，我成日都同自己講，衰仔，玩得多，亦成日都話自己，有幾耐風流就有幾耐折墮，總之我而家剩係諗同啲仔去邊度玩，7字頭開心咪得，擺晒精神喺兩個仔度，仲搞咁多仲乜？」
【其他文章】：
72歲「秦始皇」劉永廣州買複式新樓遇騙案 失6萬人民幣：連老人家血汗錢都呃
黎燕珊29歲前空姐囡囡似媽媽全盛時期 同家暴前科老公離婚捱大兩個子女苦盡甘來
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
