獨家丨玉澤演醒你絕密操靚Body秘訣 首度來港搞見面會教Fans野生捕獲方法
發佈時間：07:00 2023-09-18
韓團2PM日前舉行出道15周年演唱會，繼2017年後，相隔6年再合體開騷。34歲的成員玉澤演，之後就要忙於展開出道以來首個亞洲巡迴見面會《2023 OK TAECYEON in Asia：SpecialTY》，首站上周六在台北登場，9月29日輪到陪香港fans過中秋。8年冇來港的澤演，接受《頭條日報》獨家訪問透露私密生活時間表，講操肌談下廚，問到香港fans會否如台灣fans咁幸福，可以街頭捕獲對方在鬧市單拖晨跑？澤演笑言有機會。 撰文：廖思慧
澤演由歌手身份成功轉型為演員，近年有大量作品，如在《黑道律師文森佐》中演深藏不露的反派「張漢碩」得到好評價，戲約不斷。雖然忙，但運動跟生活已不能分割，為keep住爆肌body，平日要嚴格管理身材，澤演分享絕密作息時間表，「我其實唔食早餐，起身運動吓，保持空腹狀態下先食午餐。」不過留意返澤演的「運動吓」並非郁兩下流吓汗就算，「起床後先運動2個鐘，包括做gym，加慢跑個半鐘左右。其實運動可以練氣，但我認為飲食餐單更重要，呢方面我比較注重。」
識食又識煮
澤演都有減肥嘅時候，心得就係，「唔食碳水化合物。」之後隨即補充，「但平時都會食好味嘅嘢，亦冇嘢係唔食嘅。」澤演有自己的YouTube頻道，亦不時上載Vlog，今年初去台灣工作之餘就係咁食，還邊影美食邊自家配音「嘩嘩嘩」，勁好笑，期待澤演在香港街邊篤魚蛋。另外，從其社交平台可見偶然都會下廚，包括繁複的sous vide pulled pork，澤演笑言：「平日唔會開爐，只會喺特別嘅日子下廚，例如節日或者父母生日。」而其烹飪導師就係YouTube，「通過YouTube學到好多料理。」
問到若然接拍角色需要暴瘦或放棄完美肌肉？澤演秒答絕對冇問題。「當然可以！其實為咗健康而運動，我作為大眾文化嘅人，唔係滿足我一個人，如果我喺電影及劇集中除了展現演技，仲要變瘦變肥，我絕對唔會逃避。」
香港好有型
澤演上次來港工作已是2015年的事，「真係隔咗好耐先再次來港，記憶中香港fans非常熱情地歡迎我，諗到好快同粉絲一齊留低美好回憶就好高興同激動。」澤演讚香港係一個好有型又浪漫的地方，「我細個喺韓國過節，當時電視上經常播放好多香港電影，每當見到好帥氣嘅香港演員，就會成日諗『嘩，我都好想成為咁有型嘅人』睇得多香港電影，從小就好想去香港。」之前澤演去台灣工作曾經單拖喺街頭晨跑，香港fans都好想知道，澤演在港時會唔會都落街跑吓步呢？「我記得香港非常熱，非常潮濕，所以當時喺夜市流咗好多汗。我覺得喺呢個地方跑步好有魅力，有機會嘅話，希望一邊跑一邊睇勻每個地方。」最後澤演多謝香港fans對佢嘅厚愛、關心和支持。「希望能在9月29日，Star Hall見到大家。」
《星島頭條》新網站有更多精彩內容：http://www.stheadline.com/
