獨家丨蘇皓兒吳肇軒興奮講3角戀：想試吓 拍《Food Buddies》瘋狂攬錫唔尷尬
發佈時間：07:00 2023-09-21
蘇皓兒（Chloe）和吳肇軒在ViuTV新劇《Food Buddies》跟談善言發展一段3角戀，Chloe笑言現實唔抗拒3角戀，但只限對象是韓星孔劉及李棟旭。雖然劇中有大量親密戲，但兩人唔尷尬，不過軒仔笑言對手是靚女Chloe，跟據以往經驗，有女友的話肯定被寸足兩個月。採訪：杜杜 攝影：羅安強 髮型及化妝:Al @The Attic、Melody Chiu(蘇晧兒) 服飾:INITIAL GENTLEMAN、Both(吳肇軒)、Sandro、Maje(蘇晧兒)
軒仔直言有機會都想試3角戀，「我只係試過單對單嘅戀愛，如果3個人可以咁坦承，我又覺得冇問題，可以想像到幾有趣，但一定要大家都冇受傷，同埋坦承先係核心。」Chloe就驚應付唔到，「我好易偏心，唔夠膽養多隻貓，就係驚分薄啲愛。」軒仔向Chloe作出假設，情況如她愛看的BL劇，眼前是兩個霸道總裁，Chole即表現雀躍：「即係孔劉同李棟旭一齊，哈哈！OK呀！」搞到軒仔大叫：「拖佢出去！」
拍親熱戲必須備案
兩人在劇中有大量親熱戲，軒仔笑言已較同劇其他感情線拍得保守，「我哋用好多montage去交代嗰種淫亂，咁樣仲多啲空間。」Chloe補充，「電影感強啲唔使拍晒出嚟，畀觀眾有幻想空間。」而兩人未算太熟，對拍攝攬錫戲亦有幫助，「太friend會易啲笑場。」軒仔贊同，「我覺得唔識最好，雖然我同佢會唱歌會玩，但去到呢啲場口會特別安靜專注，講清楚會發生咩事。」
提到拍親熱前要向另一半備案，自稱單身的Chloe覺得要尊重另一半，「如果我有拍拖會講聲囉！」唔肯公開感情狀況的軒仔就話：「以我經驗係要講清楚。」Chloe笑他，「即係有女朋友？！」軒仔補充，「係理解同感受之間嘅嘢，一定要講清楚，有時又會有啲戲假情真嘅新聞，啲女朋友通常OK明白，但係會寸你兩個月，哈哈！尤其係呢啲咁靚嘅對手（指Chloe），總之交代清楚就穩陣。」
《星島頭條》新網站有更多精彩內容：http://www.stheadline.com/
